काठमाडौं । भारतको उत्तराखण्ड राज्यको रुद्रप्रयोग जिल्लास्थित गौरीकुण्डमा खसेको पहिरोमा परी केही नेपाली नागरिक बेपत्ता छन् । गएको बिहीबार स्थानीय समयानुसार राति करिब साढे ११ बजे खसेको पहिरोमा परी नेपाली समेत बेपत्ता भएका हुन् ।

पहिरोमा परी बेपत्ता नेपालीको संख्याबारे आधिकारिक निकायलाई यकिन जानकारी छैन । खोजी तथा उद्धारकार्य जारी रहेको नयाँ दिल्लीस्थित नेपाली राजदूतावासले जनाएको छ ।

बेपत्ता भएका व्यक्तिको संख्याबारे दूतावास र भारतीय अधिकारीहरूलाई पनि यकिन जानकारी नभएको दूतावासका एक अधिकारीले बताए । उक्त पहिरोमा परी १६ नेपाली बेपत्ता भएको दूतावासको अनुमान छ । तर, यो अनुमान मात्र भएको ती अधिकारीले स्पष्ट पारे ।

“हामीले १६ जना बेपत्ता भएको अनुमान गरेका छौँ । यो पनि अनुमान मात्र हो । त्यहाँ रहनुभएका अरू नेपालीहरूले बताउनुभएको जानकारीका आधारमा अनुमान मात्र गरिएको हो, यकिन संख्या होइन,” ती अधिकारीले बाह्रखरीसित भने, “योभन्दा धेरै वा थोरै बेपत्ता भएको हुन सक्नुहुन्छ । यति नै संख्यामा बेपत्ता भएको पनि हुनसक्छ ।”

पहिरो खसेको ठाउँ केदारनाथधाम यात्रामा जाने मार्गमा पर्ने र त्यहाँ नेपालीका अस्थायी प्रकृतिका होटेल रहेका उनले जानकारी दिए । सोही कारण त्यहाँ कति नेपाली रहने गरेका थिए भन्ने यकिन विवरण थाहा नभएको उनको भनाइ छ ।

“पहिरो खसेको ठाउँमा स्थायी होटेल होइन, सानातिना होटेल हुन् । केदारनाथ जाने बाटोमा पर्ने हो । छाप्रा किसिमका होटेलमा कतिजना थिए भन्ने थाहा हुन सकेको छैन,” ती अधिकारीले भने ।

त्यहाँ आउजाउ गर्ने अरू व्यक्तिले दिएको जानकारीका आधारमा दूतावास र भारतीय अधिकारीहरूले बेपत्ताको विवरण संकलन गरिरहेको उनले बताए । पहिरोमा नेपालका कुन ठाउँका कतिजना परेका छन् भन्ने स्पष्ट बताउन सकिने अवस्था नरहेको ती अधिकारीले सुनाए ।

“जुम्लाका एकै परिवारका सातजना परेका छन् भन्ने आएको छ । कालीकोटका पनि परेका छन् भन्ने आएको छ । तर, यी सबै त्यहाँ रहेका अरूले भनेका आधारमा हुन्, पुष्टि भएको होइन,” ती अधिकारीले भने, “अरू जिल्लाका पनि छन् भन्ने छ । तर, ठ्याक्कै बताउन सकिने छैन ।”

घटनास्थलमा तीन शव फेला परेको र तीमध्ये एक नेपालीको सनाखत भएको जानकारी त्यहाँ रहेका अरू व्यक्तिले दूतावासमा गराएको उनले बताए ।

“तीन शवमध्ये एक कालीकोटका टेकबहादुर विकको रहेको जानकारी अरू व्यक्तिले गराउनुभएको छ । अर्को एक शव पनि नेपालीको भन्ने जानकारी आएको छ, तर पहिचान भएको छैन,” ती अधिकारीले भने, “एक शव भने नेपालीको नभई भारतीयकै भन्ने छ ।”

सो क्षेत्रमा ठूलो संख्यामा तीर्थयात्री आउजाउ गर्ने र त्यस्ता होटेलमा बस्ने गरेकाले पहिरोमा परेकाको यकिन विवरण थाहा हुन कठिन भएको उनले बताए । नेपालीको होटेलमा उनीहरूकै आफन्त, अरू नेपाली वा विदेशी समेत रहेको हुन सक्ने ती अधिकारीको भनाइ छ ।

घटनास्थलमा उद्धार र खोजीकार्य जारी रहेको उनले जानकारी दिए । आफूहरूले भारतीय अधिकारी र त्यहाँ रहेका अरू व्यक्तिहरूसित समन्वय गरिरहेको उनले बताए ।

“उद्धार र खोजीकार्य जारी छ । हामीले समन्वय गरिरहेका छौँ । परराष्ट्रमन्त्री (एनपी साउद)ले पनि खोजीका लागि उत्तराखण्डका मुख्यमन्त्रीसँग आग्रह गर्नुभएको छ,” ती अधिकारीले भने, “तर, बेपत्तालाई फेला पार्न सकिएको छैन । उहाँहरू कहाँ हुनुहुन्छ, थाहा छैन । उहाँहरू सम्पर्कविहीन हुनुहुन्छ ।”