काठमाडौं । यही साउन ३ गते राजस्व अनुसन्धान विभागले बरामद गरेको करिब एक क्विन्टल सुनको अनुसन्धान अब नेपाल प्रहरीको केन्द्रीय अनुसन्धान ब्युरोले गर्ने भएको छ ।

प्रधानमन्त्री पुष्पकमल दाहाल प्रचण्डले बिहीबार उक्त सुन प्रकरणको अनुसन्धान सीआईबीलाई दिन निर्देशन दिएका थिए । सोहीअनुसार अब अनुसन्धान सीआईबीले अघि बढाउने भएको हो ।

“प्रधानमन्त्रीज्यूले अनुसन्धान सीआईबीले गर्न निर्देशन दिनुभएको छ,” सीआईबी प्रमुख किरन बज्राचार्यले बाह्रखरीसँग भनिन्, “राजस्व अनुसन्धान विभागबाट फाइल आउनेबित्तिकै हामी अनुसन्धान सुरु गर्छौँ ।”

राजस्व अनुसन्धान विभागले साउन ३ गते त्रिभुवन अन्तर्राष्ट्रिय विमानस्थलको भन्सारबाट उक्त सुन पास भइसकेपछि बरामद गरेको थियो । 

‘ब्रेक सु’मा आएको सुन अहिले नेपाल राष्ट्र बैंकले राखेको छ । ब्रेक सुसहित सुनको तौल १५५ केजी रहेको छ ।

हङकङबाट आएको उक्त सुन राजस्व ठगीसँग मात्र सम्बन्धित नभएर अन्तरदेशीय अपराध र संगठित अपराधसँग पनि सम्बन्धित भएकोले अनुसन्धान गर्ने जिम्मेवारी सीआईबीलाई दिइएको उनले बताइन् ।

“अब हामी सुन तस्करीका विषयमा विस्तृत अनुसन्धान गर्छौँ । सुनको कनेक्सन कहाँ कहाँ छ, सबै अनुसन्धान गर्छौँ,” सीआईबी प्रमुख बज्राचार्यले भनिन् ।