काठमाडौं । त्रिभुवन अन्तर्राष्ट्रिय विमानस्थल अध्यागमन कार्यालयको सर्भर डाउन भएको छ । विभागका महानिर्देशक झलकराम अधिकारीले राष्ट्रिय सूचना प्रविधि केन्द्रमा रहेको डाटा सेन्टरमा सर्भरमा समस्या आएको बताएका छन् ।

“डाटा सेन्टरमा समस्या आउँदा अध्यागमनको सर्भर करिब डेढ घण्टा अवरुद्ध भएको हो । तर, म्यानुअल रूपमा काम चलेको छ । म्यानुअलरूपमा विवरण राखेर पछि सर्भरमा इन्ट्री गरिन्छ,” बाह्रखरीसँग बोल्दै विभागका महानिर्देशक अधिकारीले भने ।

अध्यागमनको ‘सिस्टम डाउन’ हुँदा दिउँसो करिब साढे ३ बजेदेखि अन्तर्राष्ट्रिय उडान प्रभावित भएको थियो । अहिले भने समस्या समाधान भइसकेको अधिकारीले बताए ।

विमानस्थल कार्यालयले अध्यागमनको सर्भर डाउन हुँदा अन्तर्राष्ट्रिय उडान सामान्य प्रभावित भएको र  म्यानुअलरूपमा उडान सेवालाई निरन्तरता दिइएको बताएको छ ।

अध्यागमन विभाागले यात्रु व्यवस्थापन पनि म्यानुअल रूपमा गरेको हो । यसअघि पनि विमानस्थलको सर्भर करिब चार घण्टा डाउन हुँदा पूरै विमानस्थलको उडान एवं अवतरण प्रभावित भएको थियो । 

अध्यागमन विभागका महानिर्देशक अधिकारी यस किसिमको समस्या नियतवश नभएको र अचानक हुने घटना भएको बताउँछन् । तर, पटकपटक समस्या आउनुले डाटा सेन्टरको सुरक्षामाथि नै प्रश्न उठ्ने गरेको छ ।