काठमाडौं । शुक्रबार सेन्ट पिटर्सवर्गमा रुस–अफ्रिका शिखर सम्मेलनमा रुसी राष्ट्रपति भ्लादिमिर पुटिनले अफ्रिकाको राजनीतिक र आर्थिक शक्ति बढ्दै गएको बताएका छन् ।

“हाम्रो आँखा अगाडि अफ्रिकी महादेश शक्तिको नयाँ केन्द्र बनिरहेको छ । यसको राजनीतिक र आर्थिक भूमिका तीब्र रूपमा बढिरहेको छ । सबैले यो वस्तुनिष्ठ वास्तविकतालाई मान्नुपर्छ,” पुटिनले शिखर सम्मेलनमा भनेका छन् ।

औपनिवेशिकताका केही स्वरुपहरू आजसम्म उन्मुलन हुन नसकेको र पूर्वसाम्राज्यवादी शक्तिले विशेष अर्थतन्त्र, सूचना र मानवीय क्षेत्रमा यसको अभ्यास गरिरहेको पुटिनको भनाइ छ ।

तर, विश्व मामिलामा एकाधिकार कायम राख्न खोज्नेहरूको प्रतिरोधका बावजुद एक वा धेरै राज्यको आधिपत्यको युग लोप हुँदै गएको उनले बताए ।

यस्तै, पुटिनले अफ्रिकी देशहरुसँगको अन्तरक्रियालाई निरन्तरता दिने र विश्व बजारमा कठिन परिस्थितिको बावजुद पनि रुस र अफ्रिका महादेशबीचको व्यापार बढ्दै गएको बताएका छन् ।

यस्तै, सम्मेलनको पहिलो दिन बिहीबार अफ्रिकन युनियन (एयू)का अध्यक्ष अजाली असुमानीले रुस–युक्रेन द्वन्द्व अन्त्य गर्नु भनेको ब्ल्याक सी क्षेत्रबाट निर्यात हुने अन्न र अन्य उत्पादनमा भर परेका हजारौं मानिसहरूलाई बचाउनु पनि भएको बताएका छन् ।