काठमाडौं । ०७९ चैतयता गाइभैँसीमा महामारीको रूपमा फैलिरहेको लम्पी स्किनबाट साढे १० लाख चौपाया संक्रमित भएका छन् । पशु सेवा विभागको तथ्यांक अनुसार चैतयता साउन ४ गतेसम्म १० लाख ५४ हजार ५५ पशु संक्रमित भएका हुन् ।

यस अवधिमा लम्पी स्किन संक्रमणबाट ४८ हजार १३३ चौपाया मरेका छन् । संक्रमितमध्ये सात लाख ६८ हजार ६४१ पशु निको भएको र दुई लाख ३७ हजार २८१ चौपायाअहिले पनि संक्रमित रहेको विभागको तथ्यांक छ ।

सातै प्रदेशका ७७ जिल्लामा संक्रमण फैलिएकोमा सबैभन्दा बढी सुदूरपश्चिम प्रभावित भएको छ । विभागको तथ्यांक अनुसार सुदूरपश्चिमका तीन लाख ९ हजार पशु संक्रमित भएका छन् भने २५ हजार ६०१ चौपाया मरेका छन् । 

कोसी र कर्णाली प्रदेश पनि लम्पी स्किनबाट बढी प्रभावित भएका छन् । कर्णालीमा दुई लाख १७ हजार १३५ चौपायामा संक्रमण देखिएको छ भने ६ हजार ७४१ पशु मरेका छन् ।  त्यस्तै, कोसीमा दुई लाख १४ हजार ६४५ चौपाया संक्रमण देखिएकोमा ४ हजार ८१४ पशु मरेका छन् ।  लुम्बिनी प्रदेशमा पनि चारहजार चौपायालम्पी स्किन संक्रमणबाट मरेका छन् । 

सरकारले यही वर्ष १० लाख ३७ हजार पशुलाई दिने गरी लम्पी स्किन डिजिज भाइरसविरुद्धको खोप ल्याएको छ । साउन ४ गतेसम्म तीन लाख एक हजार २४६ पशुलाई खोप दिइएको विभागका वरिष्ठ पशु चिकित्सक डा. मुकुल उपाध्यायले बताए । 

नेपालमा पहिलोपटक २०७७ मा लम्पी स्किन देखिएको भए पनि महामारीको रूपमा भने यो वर्ष मात्रै फैलिएको डा. उपाध्याय बताउँछन् । गाइभैँसी गोरु हुँदै पछिल्लोपटक हिमाली क्षेत्रमा पालिएका याकमा समेत यो संक्रमण पुष्टि भएको छ । 

कसरी जोगाउने पशु ? 

लम्पी स्किन संक्रमणबाट जोगाउन सरकारले अभियान नै सञ्चालन गरेर यो रोगविरुद्धको खोप (निथ्लिङ स्ट्रेन) दिइरहेको छ । संक्रमण भइसकेको पशुलाई भने एक वर्षसम्म यो खोप दिनुनपर्ने विभागले जनाएको छ । 

संक्रमणबाट जोगाउन गाइभैँसी, गोरु, राँगा र तीन महिना पूरा भएका बाच्छाबाच्छी, पाडापाडीलाई तोकेको मात्रामा बर्सेनि खोप दिनुपर्छ । त्यस्तै, नयाँ पशु ल्याइएको भए २८ दिनसम्म तिनलाई अरूभन्दा अलग्गै गोठमा राख्नु पर्छ । 

गोठ र पशुको सरसफइमा ध्यान दिन पनि विभागले सुझाएको छ । लम्पी स्किन चौपयाबाट मानिसमा भने सर्दैन ।