काठमाडौं । त्रिभुवन अन्तर्राष्ट्रिय विमानस्थल क्षेत्रबाट बुधबार बरामद गरिएको सुन काठमाडौंको बबरमहलस्थित नेपाल राष्ट्र बैंकको मुद्रा व्यवस्थापन विभाग मातहतको टक्कार महाशाखाको ढुकुटीमा राखिएको छ । बिहीबार मुचुल्का उठाएर सुन ढुकुटीमा राखिएको हो ।

राजस्व अनुसन्धान विभागको टोलीले टक्सार महाशाखालाई सुन जिम्मा लगाएर फर्किएको हो । त्यसपछि सुनलाई ढुकुटीमा राखिएको महाशाखाका निर्देशक थानेश्वर आचार्यले जानकारी दिए ।

‘ढुकुटीमा सुन राख्यौँ’ भनेर टोली फर्किएको उनले बताए । उनका अनुसार राजस्वको टोलीले थप केही नभनेसम्म सुन ढुकुटीमै रहनेछ ।

“त्यसलाई गाल्नुपर्‍यो, परीक्षण गर्नुपर्‍यो भनेर राजस्व अनुसन्धानबाट पत्र लिएर आए प्रक्रिया अघि बढ्छ,” निर्देशक आचार्यले बाह्रखरीसित भने, “नभए त्यो ढुकुटीमै रहन्छ ।”

आफूहरूले अहिले त्यसलाई केही नगर्ने उनले जानकारी दिए ।

रेडी ट्रेडलिंक बूढानीलकण्ठका नाममा हङकङबाट सो सुन ल्याइएको थियो । विभागकै टोलीले सुन बरामद गरेको थियो । विमानस्थलको भन्सार जाँचपास भएर ट्याक्सीमा लैजान लागिएको अवस्थामा सुन बरामद गरिएको थियो । सो प्रकरणमा हालसम्म ६ जना पक्राउ परेका छन् ।

मोटरसाइकल र स्कुटरको ब्रेक सुमा लुकाएर सुन ल्याइएको अनुसन्धानका क्रममा खुलेको विभागले जनाएको छ । अनुमानित १०० किलो सुन बरामद गरिएको हो ।