काठमाडौं । नेपाली कांग्रेसको जारी केन्द्रीय समिति बैठकमा महामन्त्रीद्वयले अनुशासन नमानेको प्रश्न उठेको छ । सुदूरपश्चिम प्रदेश सभापति वीरबहादुर बलायरले सांकेतिक रूपमा महामन्त्रीमाथि प्रश्न उठाएका हुन् ।
बुधबार उनले 'केन्द्रीय कार्यमितिमा बस्ने व्यक्तिहरूमा अनुशासन लागु हुन्छ कि हुँदैन ?' भनेर प्रश्न गरेका हुन् ।
“केन्द्रीय कार्यसमितिमा भएका मानिसहरूलाई अनुशासन लाग्छ कि लाग्दैन ? एउटा केन्द्रीय सदस्य, पदाधिकारी र एउटा जिम्मेवारीमा रहेका मानिसले अर्को जिम्मेवारीमा रहेका मानिसहरूको विषयमा अभिव्यक्त गरेका धारणाहरू व्यक्त गर्दैगर्दा के राम्रो गरेको छ ? त्यसैले यहाँ लगाममा धेरै छैन,” उनले भने, “तथानाम छ जे पायो त्यही गरिएको छ । अनुशासनविहीनताले कांग्रेसलाई अघि बढाउने अवस्थामा हामी छैनौँ ।”
उनले मनमौजी भएर कांग्रेस नबन्ने बताए । “आफूलाई चाहियो । आफ्नो अनुयायी चाहियो । कांग्रेसको समर्थकले पुगेन,” उनले भने, “जिल्लाको भ्रमण गर्दै जादा पनि आफ्नो समर्थक र आफूसँग आफ्नो मानमर्दन बढाउनेहरूसँग संवाद गरेर फर्कने गरेका छौँ ।”
सबै कांग्रेसलाई एक ठाउँमा ल्याउने काम कसैले नगरेको भन्दै उनले अनुशासन सबैभन्दा ठूलो विषय भएको बताए ।
