काठमाडौं । राष्ट्रिय जनता पार्टी नेपाल र संघीय समाजवादी फोरम नेपालले प्रतिनिधिसभा र प्रदेशसभा निर्वाचन अन्तर्गत दोस्रो चरणको निर्वाचनमा कम्युनिष्ट गठबन्धनलाई रोक्न जुन क्षेत्रमा जो बलियो छ त्यहाँ अन्य दलले सघाउने प्रस्ताव राखेका छन् ।

यस्तो प्रस्ताव कांग्रेसले भने मानिसकेको छैन । धेरै क्षेत्रमा राजपा र संघीय समाजवादी पार्टीको मत जोड्दा उनीहरु नै बलियो देखिने भएकाले त्यसरी तालमेलमा जान नसकिने कांग्रेसको अडान छ ।

त्यसैले गर्दा पनि कांग्रेस नेतृत्वको लोकतान्त्रिक गठबन्धनको गठन प्रक्रिया ढिलाई भइरहेको नेताहरुले जनाएका छन् ।

राष्ट्रिय जनता पार्टी (राजपा) नेपाल र संघीय समाजवादी फोरम आपसी तालमेलको गृहकार्यमा जुटेका कारण लोकतान्त्रिक गठबन्धन गठन प्रक्रियामा ढिलाई भएको हो । 

‘‘राजपा र फोरमबीच तालमेलको औपचारिक सहमति गरेर मात्रै कांग्रेससँग तालमेलका लागि कुरा अघि बढाउने सोचका कारण लोकतान्त्रिक गठबन्धन निर्माण जस्तो सुस्त देखिएको हो,’’ आसन्न निर्वाचनका लागि चुनावी तालमेल गर्न गठित ६ दलीय कार्यदलका सदस्य राजपा नेता सर्वेन्द्रनाथ शुक्लले भने । उनले समाजवादी फोरम र राजपाबीचको तालमेल अन्तिम चरणमा पुगेको पनि जानकारी दिए । 

प्रदेश नम्बर २ मा समाजवादी फोरमले प्रतिनिधि सभातर्फ १७ र प्रदेश सभातर्फ २२ तथा राजपाले प्रतिनिधि सभातर्फ १५ र प्रदेश सभातर्फ ३१ सीट लिने दुई दलबीच अनौचारिक सहमति भइसकेको छ । राजपा नेता शुक्लले दुई दलबीच भएको अनौपचारिक सहमतिमा पनि हेरफेर हुन सक्ने सम्भावना औंल्याउँदै भने, ‘‘यो नै अन्तिम होइन् । हामीहरुबीच १६–१६ सिट लिने सहमति पनि हुन सक्छ ।’’

उनले कांग्रेस नेतृत्वको लोकतान्त्रिक गठबन्धनसँग तालमेल अवश्यम्भावी रहेको दोहोर्याए । वाम गठबन्धनलाई पराजित गर्न पनि लोकतान्त्रिक शक्तिहरुबीच तालमेल आवश्यक रहेको नेता शुक्लको भनाई थियो । ‘‘वामपन्थीहरु बलियो देखिएको क्षेत्रमा चुनाव जित्न कांग्रेससँग तालमेल जरुरी छ,’’ उनले भने, ‘‘चुनाव हार्ने शंका भएका स्थानमा लोकतान्त्रिक गठबन्धनसँग तालमेल गरेरै चुनाव लड्ने तयारी भएको छ ।”

राजपा नेता शुक्लले कांग्रेस बलियो अवस्थामा रहेको क्षेत्रमा राजपा–फोरमले संयुक्त रुपमा सघाउने र राजपा–फोरम बलियो अवस्थामा रहेको क्षेत्रमा कांग्रेसले सघाउने पनि बताए । उनले राजपा–फोरम मात्रैको तालमेलले चुनाव जितिने क्षेत्रमा कांग्रेससँग तालमेल नहुने पनि स्पष्ट पारे ।  

यस्तो प्रस्तावले कांग्रेसलाई थप सशंकित बनाएको छ । 

शुक्लले ६ दलीय कायदलमा रहेका कांग्रेसका नेताहरु बुधबार राजधानी फर्केपछि कार्यदलको बैठक बस्ने बारे टुंगो लाग्ने पनि जानकारी दिए । त्यस्तै चुनावको तयारीका शिलशिलामा विराटनगरमा रहेका कांग्रेस नेता तथा कार्यदलका सदस्य डा. मिनेन्द्र रिजालले पनि राजपा–फोरमसँग चुनावी तालमेलका लागि कुराकानी चलिरहेको प्रतिक्रिया दिए । 

कार्यदलका अर्का सदस्य कांग्रेस नेता रामजनम चौधरीले पनि राजपा–फोरमसँग तालमेल गरेरै चुनावमा जाने बताए । ‘‘केही प्राविधिक कुराहरु मिल्न बाँकी हो । लोकतान्त्रिक गठबन्धन बनाएरै चुनाव लड्छौं,’’ उनले भने । 

मंसिर १० गते हुन लागेको पहिलो चरण अन्तरगत ३२ जिल्लामा हुन गइरहेको प्रतिनिधि सभा र प्रदेश सभा निर्वाचनमा कांग्रेसले राप्रपा, राप्रपा (प्रजातान्त्रिक) र नयाँ शक्ति नेपालसँग तालमेल गरेको भए पनि सहमतिविपरित केही स्थानमा आफ्नै तरिकाले उमेदवार बनाएको भन्दै कांग्रेस अन्य दलसँग असन्तुष्ट देखिएको छ ।        

फाइल तस्बिर