काठमाडौं । प्रश्नपत्र बाहिरिएपछि स्थगित गरिएको नर्सिङ लाइसेन्सको परीक्षा अब कहिले हुने भन्ने अन्योल छ । काठमाडौं प्रहरीले उक्त घटनाको छानबिन गरिरहेको छ । नेपाल नर्सिङ परिषद्ले छानबिन प्रतिवेदन कुरिरहेकाले अर्को परीक्षाको मिति टुंगो नलागेको हो ।

प्रहरी प्रतिवेदन आएपछि फेरि परीक्षा सञ्चालन गर्ने वा अहिलेकै परीक्षाअनुसारको नतिजा निकालने भन्नेबारे निर्णय गरिने परिषद्की रजिष्ट्रार शुक्ला खनालले बताइन् ।

प्रहरीले छानबिन प्रक्रियाका लागि अझै एक महिना लाग्ने जनाएको छ । घटना साइबर अपराधअन्तर्गत दर्ता गरिएको छ । “हामीले गर्ने अनुसन्धान अझै एक महिना लाग्छ । त्यसपछि सरकारी वकिलतर्फको काम हुन्छ । यो केसलाई अलि बढी नै समय लाग्ने देखिएको छ,” जिल्ला प्रहरी परिसर काठमाडौंका प्रवक्ता एवं एसपी सीताराम रिजालले भने ।

प्रश्नपत्र ‘आउट’ गरेको आरोपमा कास्कीको लेखनाथकी २० वर्षीया समीक्षा थापा, लेखनाथकै २० वर्षीया भावना गुरुङ र धादिङको त्रिपुरासुन्दरीकी २३ वर्षीया सविना आलेलाई बालाजु प्रहरी वृत्तले पक्राउ गरी अनुसन्धान गरिरहेको छ ।

यो घटनामा मुख्य योजनाकार रहेको भन्दै परिषद्ले अलब्राइट इन्स्टिच्युट पोखराविरुद्ध जाहेरी दिएको छ ।

यसरी गरिएको थियो प्रश्नपत्र आउट 
नेपाल नर्सिङ परिषद्ले वार्षिक तालिकाअनुसार यही असार २३ र २५ गते विभिन्न तहका लाइसेन्स परीक्षाको मिति तोकेको थियो । २३ गते पहिलो दिन पीसीएल, मिडवाइफ, बीएस्सी नर्सलगायत विषयको परीक्षा थियो । ६ हजार १० परीक्षार्थी सहभागी थिए ।

परीक्षा समय बिहान ९ देखि ११ः३० सम्म तोकिएको थियो । वनस्थली केन्द्रमा परीक्षा दिइरहेका मध्ये एक विद्यार्थी एक घण्टापछि शौचालय गएर फर्कने क्रममा ढिलो आए । सुरक्षागार्डले जाँच गर्दा मोबाइलबाट प्रश्नपत्र आउट भएको पाइएको थियो ।

पोखरास्थित नर्सिङ तयारी कक्षा पढाउने अल ब्राइट इन्स्टिच्युटको म्यासेन्जर ग्रुपमा प्रश्नपत्र पठाइएको र सो म्यासेज केही समयमै ४०० भन्दा बढीले ‘सिन’ गरेको पाइएको परिषद्की अध्यक्ष सरला केसीले बताइन् ।

त्यो दिन काठमाडौंका तीन केन्द्रबाट प्रश्नपत्र आउट भएपछि परीक्षा स्थगित गरिएको थियो । बालाजुस्थित सिद्धार्थ वनस्थली इन्स्टिच्युट, ललितपुरको लिटिल एन्जल्स स्कुल र वाग्मती कलेज काठमाडौं केन्द्रबाट प्रश्नपत्र बाहिरिएको परिषद्ले जनाएको छ ।

प्रश्नपत्र आउट गर्ने, उत्तर पठाउनेलगायत कार्यमा मुख्य भूमिका अलब्राइट इन्स्टिच्युटको नै रहेको केसीको जिकिर छ । परिषद्ले असार २५ गते भने परीक्षा सञ्चालन गरी नतिजा सार्वजनिक गरिसकेको छ ।