काठमाडौं । आगामी मंसिर १० गते हुने पहिलो चरणको निर्वाचनमा ७ नम्बर प्रदेशका चार जिल्लामा प्रदेश सभा र प्रतिनिधि सभाको निर्वाचन हुँदैछ । ७ नम्बर प्रदेशका दार्चुला, बैतडी, बझाङ र बाजुरामा प्रतिनिधि सभाका लागि चार र प्रदेश सभाका लागि आठ क्षेत्रमात्रै छन् ।  

यो निर्वाचनमा प्रतिनिधि सभाका लागि दार्चुलाबाट ५, बैतडीबाट ६, बझाङबाट ९ र बाजुराबाट ३ जनाको उमेदवारी परेको छ । यस्तै प्रदेश सभाका लागि दार्चुलाबाट दुबै क्षेत्रबाट ५–५, बैतडीबाट प्रदेश सभा १ बाट ५ र प्रदेश सभा २ बाट २, बझाङबाट प्रदेश सभा १ बाट ८ र प्रदेश सभा २ बाट ५ तथा बाजुराबाट दुबै क्षेत्रमा समान ५–५ जनाको उमेदवारी परेको छ । 

उमेदवारी दर्तासँगै ती जिल्लाहरुको चुनावी माहोल तातेको छ भने चुनाव कसले आफ्नो पक्षमा पार्ला भन्ने आंकलन पनि हुन थालेको छ ।  स्थानीय तहको निर्वाचनमा वडा अध्यक्षले प्राप्त मतलाई आधार मानेर तयार पारिएको विश्लेषण यस्तो छ ।

दार्चुला 
 

दार्चुलामा नेपाली कांग्रेसबाट प्रतिनिधि सभाका लागि बिक्रमबहादुर धामी, प्रदेश सभा–१ मा मदन गिरी र प्रदेश सभा–२ मा जगदिश पालले उमेदवारी दिएका छन् । यस्तै कम्युनिष्ट गठबन्धनबाट प्रतिनिधि सभाका लागि गणेशसिँह ठगुन्ना, प्रदेश सभा–१ मा बीरबहादुर ठगुन्ना र प्रदेश सभा–२ मा मानबहादुर धामीको उमेदवारी परेको छ ।    
जिल्लामा ९ वटा स्थानीय तह रहेका छन् । गत असार १४ मा सम्पन्न दोस्रो चरणको निर्वाचनमा दार्चुलाका ९ स्थानीय तह मध्ये नेपाली कांग्रेसले ५, नेकपा एमालेले तीन र नेकपा माओवादी केन्द्रले १ स्थानमा जित हात पारेको थियो । 
स्थानीय तह निर्वाचनको मत परिणाम अनुसार दार्चुलामा सत्तारुढ कांग्रेसभन्दा कम्युनिष्ट गठबन्धन बलियो देखिएको छ । दार्चुलामा वाम गठबन्धनका पक्षमा २९ हजार ७३८ मत रहेको छ । स्थानीय तहको निर्वाचनको मत परिणाम अनुसार एक्ला–एक्लै कांग्रेस बलियो भए पनि एमाले–माओवादी गठबन्धनका कारण कमजोर देखिएको छ । उसले स्थानीय तह निर्वाचनमा २२ हजार १६१ मत ल्याउँदा एमालेले २० हजार ६२६ र माओवादीले नौ हजार ११२ मत पाएको थियो । 

बैतडी 
 

बैतडीबाट कांग्रेसले प्रतिनिधि सभा सदस्यतर्फ नरबहादुर चन्दलाई उठाएको छ । उसले प्रदेश सभा–१ बाट हरिमोहन भण्डारी र प्रदेश सभा–२ बाट राप्रपाका गणेश चन्दलाई उमेदवार बनाएको छ । कम्युनिष्ट गठबन्धनबाट दामोदर भण्डारीले प्रतिनिधि सभा सदस्यका लागि उमेदवारी दर्ता गराएका छन् । गठबन्धनबाट प्रदेश सभा–१ मा केशव भट्ट र प्रदेश सभा–२ मा लीलाधर भट्ट उठेका छन् । 

स्थानीय तह निर्वाचनमा १० स्थानीय तह रहेको बैतडीमा कांग्रेसले ६, एमालेले ३ र माओवादीले १ तहमा जित हासिल गरेको थियो । स्थानीय तह निर्वाचनको परिणाम अनुसार बैतडीमा पनि गठबन्धन बलियो देखिन्छ । 

स्थानीय तहको निर्वाचन परिणामले कम्युनिष्ट गठबन्धनको पक्षमा ४६ हजार १०८ मतदाता रहेको देखाएको छ ।  राप्रपासँग तालमेल गरेको कांग्रेससँग ३३ हजार चार सय ९१ मत रहेको छ । 

स्थानीय तह निर्वाचनमा बैतडीबाट एमालेले सबैभन्दा बढी २७ हजार ३८९ मत, कांग्रेसले २७ हजार ८७ मत, माओवादीले १८ हजार ७१९ मत र राप्रपाले ६ हजार ४०४ मत पाएका थिए । 

बझाङ 
 

बझाङमा प्रतिनिधि सभा सदस्यका लागि कांग्रेसले पृथ्वीबहादुर सिँहलाई उमेदवार बनाएको छ । उसले प्रदेश सभा–१ मा चन्द्रदेवी जोशी र प्रदेश सभा–२ मा नरेशबहादुर सिँहलाई टिकट दिएको छ । उता कम्युनिष्ट गठबन्धनले प्रतिनिधि सभामा भैरवबहादुर सिँह, प्रदेश सभा–१ मा अर्जुन थापा र प्रदेश सभा–२ मा देवकी मल्ललाई उठाएको छ । 

जिल्लामा १२ स्थानीय तह रहेका छन् । दोस्रो चरणको स्थानीय तह निर्वाचनमा बझाङका ८ स्थानीय तहमा एमाले र ४ तहमा कांग्रेस विजयी भएको थियो । पछिल्लो चुनावको मत परिणामअनुसार कांग्रेसको तुलनामा एक्लै बलियो दखिएको एमालेलाई गठबन्धनले झनै मजबुत बनाएको छ । 

बझाङमा पनि स्थानीय तहको मतलाई हेर्दा कांग्रेसभन्दा १५ हजारभन्दा बढी मत कम्युनिष्ट गठबन्धनको रहेको छ ।

बझाङको कुल मतदाता संख्या मध्ये वाम गठबन्धनसँग ४० हजार ७२२ र कांग्रेससँग २५ हजार ५८१ मत छ । स्थानीय तह निर्वाचनमा एमालेले २८ हजार ५८९ र माओवादीले १२ हजार १३३ मत ल्याएका थिए । 

बाजुरा 
 

बाजुरामा कांग्रेसका तर्फबाट कवीराज पण्डित र कम्युनिष्ट गठबन्धनका तर्फबाट लालबहादुर थापाले प्रतिनिधि सभा निर्वाचनका लागि उमेदवारी दिएका छन् । बाजुरा प्रदेश सभा–१ बाट कांग्रेसका जनकराज गिरी र गठबन्धनका बलदेव रेग्मी तथा प्रदेश सभा–२ बाट कांग्रेसका पदमबहादुर शाही र गठबन्धनका प्रकाश शाहको उमेदवारी परेको छ । 

बाजुरामा नौ स्थानीय तहमध्ये ६ तहमा कांग्रेस र  ३ तहमा एमालेले जितेको छ । एक्लाएक्लै बलियो देखिएको कांग्रेसलाई गठबन्धनले बाजुरामा पनि कामजोर बनाएको छ । जिल्लामा कम्युनिष्ट गठबन्धनका पक्षमा २७ हजार ४८० मत छ । पछिल्लो निर्वाचन परिणामले कांग्रेसको पक्षमा २२ हजार ७९२ मत देखाएको छ । 

स्थानीय तह निर्वाचनमा कांग्रेसले २२ हजार ७९२, एमालेले २२ हजार ५५ र माओवादीले ४ हजार ४२५ मत ल्याएका थिए । 

स्थानीय तह निर्वाचनको मतअनुसार पहिलो चरण अन्तर्गत हुने निर्वाचनमा ७ नम्बर प्रदेशका चार जिल्लामा वाम गठबन्धन बलियो देखिएको छ । तर, स्थानीय तहको वडा स्तरमा चुनाव लड्ने व्यक्तिको प्रभावका कारण मत घटबढ हुने भएकाले कसले बाजी मार्ला भन्ने अनुमान लगाउन सहज छैन ।

७ नम्बर प्रदेशमा पहिलो चरण अन्तरगत हुन गइरहेका जिल्लाहरुबाट राष्ट्रिय राजनीतिमा प्रभाव जमाएका तीन जना नेताहरु यस पटक प्रत्यक्ष चुनावी प्रतिष्पर्धाबाट बाहिरिएका छन् । दार्चुलाबाट चुनाव लड्दै आएका कांग्रेस नेता दिलेन्द्रप्रसाद बडू, बाजुराबाट राजनीतिक उचाई लिएका कांग्रेसकै बद्री पाण्डेय र एमालेका कर्ण थापा प्रत्यक्ष चुनावी प्रतिष्पर्धाबाट बाहिरिएका हुन् । उनीहरु तीनै जनालाई सम्बन्धित पार्टीहरुले समानुपातिकतर्फ सिफारिश गरेको छ । 

फाइल तस्बिर