काठमाडौं । विद्युतीय व्यापार विधेयक, २०८० राष्ट्रियसभामा पेस गरिएको छ । मंगलबार बसेको बैठकमा उद्योग, वाणिज्य तथा आपूर्तिमन्त्री रमेश रिजालले उक्त विधेयक पेस गरेका हुन् ।

विधेयक पेस गर्दै मन्त्री रिजालले विद्युतीय माध्यमबाट वस्तु तथा सेवाको कारोबार बढ्दो क्रममा रहेकाले यसलाई नियमन, सहजीकरण र व्यवस्थित गर्न कानुन आवश्यक रहेको बताए । विद्युतीय माध्यमबाट साना तथा मझौला उद्योग। व्यवसायको प्रवर्द्धन गर्नका लागि यसको आवश्यकता भएको उनले उल्लेख गरे ।

यसअघि, राष्ट्रियसभा अध्यक्ष गणेशप्रसाद तिमिल्सिनाले विधेयकका विषयमा कुनै विरोधको सूचना प्राप्त नभएको जानकारी गराएका थिए ।