काठमाडौं । नेपाली कांग्रेसका जिल्ला सभापतिहरूको भेलामा सरकार, अर्थमन्त्री प्रकाशशरण महत र आगामी आर्थिक वर्षको बजेटमाथि छलफल केन्द्रित भएको छ । अर्थमन्त्री र बजेटमाथि जिल्ला सभापतिहरू आक्रोशित रुपमा प्रस्तुत भएका छन् ।

बिहीबार पार्टी केन्द्रीय कार्यालय सानेपामा भएको जिल्ला सभापतिहरूको छलफलमा बोल्ने सांसद समेत रहेका जिल्ला सभापतिहरूले आफ्नै दलबाट अर्थमन्त्री बनेका प्रकाशशरण महतको बजेट नीतिप्रति आपत्ति जनाएका हुन् । अर्थमन्त्री महतले गुट नमिलेर बजेट कटौती गरेको भन्दै उनीहरूले गम्भीर आपत्ति जनाएको बैठकमा सहभागी एक नेताले बाह्रखरीलाई जानकारी दिए ।

“बोलेका ९० प्रतिशत सभापतिहरूले बजेटमा आपत्ति जनाउनुभयो । यतिसम्म कि, अर्थमन्त्रीले गुट नमिलेका कारणले बजेट कटौती गरेको भन्दै बैठकमा आपत्ति जनाउने काम भयो,” ती नेताले भने ।

पार्टी सदस्यता वितरण ‘डिजिटल’ बनाइएको र त्यससम्बन्धी प्रशिक्षणका लागि बोलाइएको बैठकमा सभापतिहरू विषयान्तर भएर आफ्नै दलले नेतृत्व गरेको सरकारले पार्टीलाई जोड्न नसकेको र बजेट नुवाकोट, डडेलधुराकेन्द्रित भएको भन्दै विरोधमा उत्रिए ।

पार्टीले क्रियाशील सदस्यता र सदस्यको वितरण, नवीकरण र अभिलेखीकरण, पार्टीका विभिन्न तहका सम्मेलन, पार्टी सञ्चालन तथा व्यवस्थापनलगायत अन्य विविध सांगठनिक विषय बैठकको एजेन्डा राखेर बैठक बोलाएको थियो । तर, बजेटको विषय लिएर युवा तथा खेलकुदमन्त्री समेत रहेका मोरङ्ग जिल्ला सभापति डिगबहादुर लिम्बु नै बजेट र अर्थमन्त्रीसँग असन्तुष्ट देखिएका बैठकमा सहभागी एक नेताले बताए ।

लिम्बूले अर्थमन्त्रीले मात्र जिल्लामा बजेट लगेको आरोप लगाए । उनले आफूले भने मन्त्री भएर पनि जिल्लामा बजेट लैजान नसकेको भन्दै आपत्ति जनाएको एक नेताले जिकिर गरे ।

“अर्थमन्त्रीले बजेट आफ्नो जिल्लामा लगे । समानुपातिक बजेट वितरण भएन । सिलिङ घटाएर पठाएको छ, अर्थमन्त्रीले गुट नमिलेको कारणले बजेट कटौती गर्नुभयो,” लिम्बूको भनाइ उद्धृत गर्दै ती नेताले भने, “म मन्त्री त हुँ । तर, मैले मेरो जिल्लामा बजेट लैजान सकिनँ ।”

बैठकमा बोलेका धादिङ जिल्ला सभापति रामनाथ अधिकारीले जिल्लाले बजेट नपाएको भन्दै कुुन मुख लिएर जिल्ला जाने भन्ने प्रश्न गरे । प्रतिनिधिसभा सांसद समेत रहेका उनले आफूलाई ९० किलोमिटर सडक निर्माणका लागि पाँच लाख छुट्याइएको भन्दै गुनासो गरे ।

“९० किलोमिटर बाटोका लागि पाँच लाख विनियोजन गरेर अर्थमन्त्रीले हामीलाई ठूलो उद्धार गर्नुभयो । उहाँलाई धेरै धेरै धन्यवाद । धादिङलाई पाँच लाख दिने, बजेट जति सबै नुवाकोटतिर हाल्ने,” अधिकारीले बैठकमा भने, “जिल्ला जान सक्ने अवस्था छैन । कुन मुख लिएर जिल्ला जाने ? निराश पार्नुभयो ।”

अर्घाखाँची जिल्ला सभापति केशव श्रेष्ठले पार्टीबाट सरकारमा गएर मन्त्री बनेकाहरू 'पशुपतिका साँढे जस्तो' भएको भन्दै आक्रोश पोखे । अर्थमन्त्रीलाई भेट्न खोज्दा भेट नदिएको भन्दै उनले सो अभिव्यक्ति दिएको ती नेताले जानकारी दिए । मकवानपुर जिल्ला सभापति बुद्ध लामाले पनि बजेटमाथि असन्तुष्टि पोख्दै स्थानीय तहका जनप्रतिनिधि पार्टीबाट टाढिन थालेको जिकिर गरे ।

अछामका पार्टी सभापति पुष्पबहादुर शाहले पनि केन्द्र र प्रदेश दुवैतिर मन्त्रीहरूले बजेट एकलौटी गरेका कारण जिल्ला जाने अवस्था नभएको र आफूहरूलाई समस्या परेको धारणा राखे । बाजुरा जिल्ला सभापति रामसिंह रावलले बजेटको विषयमा असन्तुष्टि जनाएको बैठकमा सहभागी एक नेताले बताएका छन् ।

सरकार र पार्टीबीच खोजियो समन्वय

बैठकमा जिल्ला सभापतिहरूलाई आफ्नो प्रगति विवरण पनि उल्लेख गर्न लगाइएको थियो । बैठकमा बोल्ने जिल्ला सभापति र विशेष गरेर सांसद समेत रहेका जिल्ला सभापतिहरूले सरकार र पार्टीबीचको सम्बन्ध खोजेका छन् ।

कांग्रेस सरकारमा भए पनि त्यसको आभास र अनुभूति जनता र पार्टी कार्यकर्ताले गर्न नपाएको भन्दै जिल्ला सभापतिहरूले प्रश्न उठाएका छन् । सांसद समेत रहेका संखुवासभा जिल्ला सभापति दीपक खड्काले कांग्रेस नेता र सांसदहरूले आफ्नै पार्टीका मन्त्रीलाई भेट्न नपाएको भन्दै गुनासो गरे । उनले सरकार भएको अनुभूति दिलाउन पार्टी चुकेको भन्दै बैठकमा आक्रोश पोखेको एक जिल्ला सभापतिले बाह्रखरीलाई जानकारी दिए ।

“दीपक खड्काले मन्त्रीसँग भेट हुन नपाएको भन्दै बाढीपहिरो पीडितलाई राहत नदिएको भन्दै प्रश्न गर्नुभयो । उहाँले कांग्रेसको सरकार भए पनि त्यसको अनुभूति नभएको कुरा राख्नुभयो,” ती जिल्ला सभापतिले भने ।

बैठकमा बोलेका नन्दप्रसाद न्यौपानेले पनि कांग्रेसको सरकार भएको अनुभूति पार्टी कार्यकर्ता र जनतालाई किन दिलाउन नसकेको भन्दै प्रश्न गरे । उनले गाउँ गाउँमा भएको समस्या सुनाउन मन्त्रालय धाउँदा मन्त्रीले समय नदिएपछि जनताको समस्या कसले सुन्छ भन्दै प्रश्न गरे ।

“यो सरकार भएको अनुभूति भएन । मन्त्रीले नै कांग्रेस सभापतिलाई भेट्न समय दिँदैन भने गाउँको समस्या कसरी थाहा हुन्छ,” न्यौपानेले भने, “चुनाव लड्दा जनताको समस्या समाधान गर्छु भन्ने तर अहिले मन्त्री भएपछि जनताको बेवास्ता गर्ने । यसरी जनताको समस्या कसरी समाधान हुन्छ ? संगठन कसरी बलियो हुन्छ ?”

उठ्यो नक्कली भुटानी शरणार्थी प्रकरणको विषयबैठकमा नक्कली भुटानी शरणार्थी प्रकरणमा कांग्रेस नेतृत्व परेकोमा पनि प्रश्न उठेको थियो ।

पूर्णबहादुर ‘कान्छाराम’ तामाङले पनि यो विषयमा आपत्ति जनाए । उनले यो प्रकरणमा थुनामा रहेका आङटावा शेर्पाको नामै लिएर कुरा राखेको बैठकमा सहभागी एक नेताले बताए । तामाङले २०७४ सालको निर्वाचनमा शेर्पाले अन्तर्घात गरेको र कारबाहीका लागि सिफारिस गर्दाको परिणाम अहिलेको भएको भन्दै पार्टीले नहेरे पनि भगवानले सफाइ दिएको जिकिर गरेको ती नेताले बताए ।

“उहाँले भीष्मराज आङ्देम्बेलाई देखाएर अघिल्लोपटक कारबाहीका लागि सिफारिस गर्दा अनुशासन समितिले कारबाही गर्न खुट्टा कमायो । जोगाउने काम भयो,” तामाङको भनाइ उद्धृत गर्दै ती नेताले भने, “मैले त अहिले चुनाव जितेँ । आखिर आङटावालाई भगवानले सजाय दिए । जेलमा परेकालाई निलम्बन गर्न पर्दैन, किन निलम्बन नगरेको ?”

‘रूपान्तरण अभियान’को विरोध

बैठकमा पार्टीको दोस्रो समूहका नेताहरूले सातै प्रदेश र डायस्पोराका लागि आयोजना गरेको रूपान्तरण अभियानमा समेत आपत्ति जनाइएको छ । इतर समूहका नेताहरूले गरेको कार्यक्रमलाई संस्थापन समूहका सभापतिले विरोध गरेका हुन् ।

सांसद समेत रहेका रामेछाप जिल्ला सभापति पूर्णबहादुर ‘कान्छाराम’ तामाङले आफूले महामन्त्रीलाई रूपान्तरण अभियान भनेर पार्टी कमजोर बनाउने काम नगर्न आग्रह गरेको जानकारी दिए ।

“यसले ग्रुपिजम गर्यो । मेरो जिल्लामा आएको भए त यताबाट आउनुभयो, यताबाट जानुहोस् भनेर कार्यक्रम गर्न दिने थिइनँ भनेर भनेँ,” तामाङले बाह्रखरीसँग भने । पार्टीले चिठी पठाएर आधिकारिकता नदिएको कार्यक्रमलाई मान्यता दिन नसकिने आफूले धारणा राखेको उनले बताए ।

दोलखा जिल्ला सभापति वर्मा लामाले महाधिवेशनबाट निर्वाचित जिल्लाका नेताहरू कोही विदेश गएको, कोहीले पार्टी छाडेको र भएकाहरूले पनि बैठकमा नआएकाले यसमा के गर्न सकिन्छ भन्ने स्पष्ट खाका माग गरेको जानकारी दिए ।

तरूण दल जम्बो भयो, सल्लाह भएन

बैठकमा तरूण दलको केन्द्रीइ समिति जम्बो आएको भन्दै विरोध भएको छ । मकवानपुर जिल्ला सभापति बुद्ध लामा तथा रामेछाप सभापति कान्छाराम तामाङले यो विषयमा प्रश्न उठाएका थिए ।

मकवानपुर सभापति लामाले तरुण दलको जम्बो केन्द्रीय समिति भएको भन्दै जिल्ला सभापतिलाई जानकारी समेत नदिएर पद बाँडिएको बताए । यस्तै, रामेछाप सभापति तामाङले पनि तरुण दल, महिला संघलगायत संस्था ल्याउँदा जिल्ला सभापतिलाई किन नसोधेको भन्दै कुरा राखेको जानकारी दिए । उनले यत्रो जम्बो टिम आउँदा पनि आफ्नो जिल्लाबाट केन्द्रीय सदस्य नबनेकोमा पनि आपत्ति जनाए ।

गुल्मी सभापति खिलध्वज पन्थीले त झन् कम्तीमा रुख चिह्नमा मत दिनेलाई केन्द्रीय सदस्य बनाइनुपर्नेमा मतदाता नामवलीमा नाम नै नभएकालाई केन्द्रीय सदस्य बनाएको जिकिर गरे ।

सच्याइएको* यसअघि प्रकाशित समाचारमा अर्घाखाँचीका जिल्ला सभापति श्रेष्ठले राखेका धारणा भुलवस गलत पर्न गएकाले सच्याइएको छ ।