काठमाडौं । परराष्ट्रमन्त्री नारायण प्रकाश (एनपी) साउदले द्वन्द्वको शान्तिपूर्ण समाधानको सामूहिक प्रयास गर्न विश्वका नेतालाई आग्रह गरेका छन् ।

परराष्ट्रमन्त्री साउदले असंलग्न आन्दोलनको समय–परीक्षित सिद्धान्तको महत्त्वलाई जोड दिँदै वार्ता, समझदारी र द्वन्द्वको शान्तिपूर्ण समाधानको प्रवर्द्धनमा सामूहिक प्रयास गर्न विश्व नेताहरूलाई आग्रह गरे ।

अजरबैजानको बाकुमा आयोजना भएको असंलग्न आन्दोलन (नाम)को मन्त्रीस्तरीय बैठकलाई सम्बोधन गर्दै उनले आज वर्तमान विश्वव्यापी चुनौतीहरूबारे प्रकाश पार्दै संवाद र विविधताको सम्मानबाट दिगो शान्ति प्रवर्द्धन गर्नुपर्ने बताए ।

नामभित्र अन्तर्राष्ट्रिय सहयोग प्रवर्द्धन, दक्षिण–दक्षिण सहयोगलाई प्रगाढ बनाउन र विश्वव्यापी समस्याको समाधानका लागि केन्द्रमा रहेको संयुक्त राष्ट्रसंघसँग बहुपक्षीयतालाई सुदृढ गर्ने आवश्यकतामा जोड दिए ।

“नेपाल नामको सिद्धान्त र यी चुनौतीहरूको सामना गर्ने एकताको शक्तिमा दृढ विश्वास गर्दछ,” उनले भने ।

दिगो विकासका लागि सन् २०३० को एजेण्डा हासिल गर्न आर्थिक विकासलाई तीव्रता दिनुपर्ने र न्यायपूर्ण, समावेशी र समतामूलक विश्व व्यवस्थाका लागि प्रयास गर्नुपर्नेमा उनले जोड दिए । कोही पनि पछि नपरोस् भनेर सबैको समृद्धि सुनिश्चित गर्नुपर्नेमा मन्त्री साउदले जोड दिए ।

सन् २०२६ सम्ममा अल्पविकसित मुलुकबाट उत्तीर्ण हुने नेपालको आकांक्षालाई प्रकाश पार्दै परराष्ट्रमन्त्रीले नेपालमा जलवायु परिवर्तनको प्रतिकूल असरलाई पनि जोड दिए । जलवायु न्याय, दिगो विकासको प्रवर्द्धन र जलवायुसम्बन्धी सहयोग जुटाउन नामको सामूहिक वकालत गर्नुपर्ने आवश्यकतामा उनले जोड दिए ।

कार्यक्रमका अवसरमा परराष्ट्रमन्त्रीले मलेसियाका विदेशमन्त्री डा. जाम्ब्री अब्द कादिर, भेनेजुएलाका विदेशमन्त्री युभान गिल–पिन्टो, इथियोपियाका विदेश राज्यमन्त्री मेसगानु अर्गामोच र भियतनामको विदेश मामिलामन्त्री डो हङ भियतसँग वार्ता गरे ।