काठमाडौं । नेपाल आयल निगमले इन्धनको मूल्य घटाएकोे छ । समायोजनपछिको मूल्यका आधारमा निगम आगामी १५ दिनका लागि एक अर्ब नाफामा जाने देखिएको छ ।
सोमबार राति १२ बजेदेखि लागु भएको इन्धनको मूल्यअनुसार निगम एक अर्ब नाफामा हुनेछ । जुलाई १ तारिखमा इन्डियन आयल कर्पाेरेसन (आईओसी)ले निगमलाई उपलब्ध गराएको मूल्यसूचीअनुसार निगम एक अर्ब ६० करोड रूपैयाँ नाफामा थियो ।
निगमले सोमबार मूल्य समायोजन गरेर पेट्रोलियमको मूल्य घटाएसँगै जुलाई १६ तारेखसम्म एक अर्ब नाफामा रहेको निगमका प्रवक्ता मनोजकुमार ठाकुरले जानकारी दिए ।
जुलाई १ तारिखमा आईओसीबाट मूल्य घटेर आएपछि मूल्य समायोजन गरेर इन्धनको मूल्य निगमले घटाएको छ । अहिले आईओसीले निगमलाई प्रत्येक महिनाको दुई दिन (१ र १६ तारिख)मा नयाँ मूल्यसूची उपलब्ध गराउँदै आएको छ । सोहीअनुसार जुलाई १ तारिखमा आईओसीले पेट्रोलियम पदार्थको मूल्य घटाएर पठाएको थियो ।
त्यससँगै निगमले सोमबार तीनवटा वर्गीकरण गरेर पेट्रोल, डिजेल र मट्टीतेलको मूल्य समायोजन गरेको थियो । निगमले पहिलो, दोस्रो र तेस्रो गरी तीनवटा वर्गीकरण गरेर पेट्रोल, डिजेल र मट्टीतेलको मूल्य घटाएको हो ।
पहिलो वर्गअन्तर्गत निगमले चारआली, विराटनगर, जनकपुर, वीरगञ्ज, अमलेखगञ्ज, भलबारी नेपालगञ्ज र धनगढीमा पेट्रोल, डिजेल र मट्टीतेलको मूल्य प्रतिलिटर सात रुपैयाँ ५० पैसा घटाएको छ ।
त्यस्तै, दोस्रो वर्गअन्तर्गत सुर्खेत र दाङमा ६ रुपैयाँ घटाएको छ भने र तेस्रो वर्गअन्तर्गत पर्ने काठमाडौं, पोखरा र दिपायलमा प्रतिलिटर पाँच रुपैयाँले मूल्य घटाएको थियो ।
निगमले हाल प्रत्येक महिनाको आठ र २३ तारिखमा भुक्तानी गर्दै आएको छ । निगमले इन्धन खरिद गरेबापत आईओसीलाई सावाँ र ब्याज गरी २४ अर्ब ४५ करोड ऋण तिर्नुपर्ने थियो । जसमध्ये सावाँबापतको २४ अर्ब रुपैयाँ जुन २३ तारिखमा तिरेको प्रवक्ता ठाकुरले जानकारी दिए ।
त्यस्तै, ब्याजबापत रहेको ४५ करोडमा पनि २८ करोड रुपैयाँँ भुक्तानी गरिसकेको उनले बताए । आब आईओसीलाई भुक्तानी गर्न १७ करोड रुपैयाँ रहेको ठाकुरले जानकारी दिए । बाँकी रहेको १७ करोड ब्याज रकम पनि जुलाई ८ मा भुक्तानी गर्ने उनले बताए ।
निगमले नाफा, भ्याट रिफन्ड र मूल्य स्थिरीकरण कोषमा राख्नुपर्ने पैसा जम्मा गरेर आईओसीलाई ऋण तिरेको हो । निगम चालु आर्थिक वर्ष २०७९÷०८० को जेठ मसान्तसम्ममा १७ अर्ब नाफामा रहेको थियो । उक्त नाफामा भ्याट रिफन्डबाट साढे तीन अर्ब र मूल्य स्थिरीकरण कोषमा राख्नु पर्ने साढे तीन अर्ब गरी आईओसीलाई २४ अर्ब रुपैयाँ भुक्तानी गरेको ठाकुरले जानकारी दिए ।
मूल्य समायोजनपछि कहाँ कति मूल्य ?
निगमले गएराति १२ बजेदेखि लागु हुने गरी इन्धनको मूल्य घटाएको छ । यससँगै काठमाडौं, पोखरा र दिपायलमा पेट्रोलको मूल्य प्रतिलिटर १७० रुपैयाँ पर्नेछ । यस्तै, डिजेल र मट्टीतेलको मूल्य प्रतिलिटर १५० रुपैयाँ पर्नेछ ।
पहिलो वर्गमा राखिएका तराईका जिल्लाहरूमा पेट्रोलको मूल्य प्रतिलिटर १७५ रुपैयाँ कायम गरिएको छ भने डिजेल र मट्टीतेलको मूल्य प्रतिलिटर १५५ रुपैयाँ तोकिएको छ ।
निगमले खाना पकाउने एलपी ग्यासको मूल्य भने यथावत् राखेको छ । यस्तै, आन्तरिक हवाई इन्धनको मूल्य प्रतिलिटर १४ रुपैयाँ तथा बाह्य इन्धनको मूल्य १५ रुपैयाँले घटेको छ ।
