काठमाडौं । चलचित्र ‘परस्त्री’मा हिंसा र बेड सिनका केही दृश्य छन् । जुन दृश्य नेपाली चलचित्रमा कमै मात्र हुन्छन् । विवाहेत्तर सम्बन्धको कथामा बनेको चलचित्रमा निर्देशक यौन र हिंसामा निकै उदार देखिएका छन् । 

सेक्स र विवाहेत्तर सम्बन्धका कारण श्रीमान् श्रीमतीको सम्बन्धमा दरार आएपछि घटनाक्रम विकास हुने क्रममा चलचित्रमा यौन र हिंसाका दृश्य समेटिन पुग्छन् । जुन नेपाली चलचित्रमा यो मात्रामा कमै मात्रै देखिने गरेको छ । 

सिनेमाको मुख्य पात्र विश्वासले होटेलको रुममा युवतीको हत्यापछि शव व्यवस्थापनका क्रममा देखाइएको दृश्य निकै विभत्स छन् । 

सिनेमा रहेका हिंसा, चुम्बन र बेड सिनकै कारण सुरुमा चलचित्र सेन्सर बोर्डले जाँच पासको सर्टिफिकेट दिन अस्वीकार गरेको थियो । आधा दर्जन सिन हटाउन वा ब्लोर गर्न अथवा ब्ल्याक एन्ड ह्वाइट बनाउन भन्दै सुरुमा सेन्सरले जाँच पासको सर्टिफिकेट दिएको थिएन । पछि उक्त सिनेमाले पीजी सर्टिफिकेट पाएको थियो । 

सुरज पाण्डेको निर्देशन रहेको चलचित्रमा कोसिस क्षेत्री, शिल्पा मास्के र गौरव विष्ट मुख्य भूमिकामा छन् । शर्मिला पाण्डेको निर्माण गरेको चलचित्रको कथा दीपेन्द्र के खनालले लेखेका हुन् । 

‘परस्त्री’ आजबाट नेपालमा रिलिज भएको छ । भोलि भारतमा रिलिज हुँदै छ ।