काठमाडौं । अर्थमन्त्री डा. प्रकाशशरण महतले दबाब थेग्न नसकेर स–साना आयोजनाहरुमा पनि बजेट विनियोजन गरेको बताएका छन् ।

मंगलबार प्रतिनिधिसभा बैठकमा बोल्दै अर्थमन्त्री महतले आफू संघीय सरकारबाट स–साना आयोजनाका लागि थोरै रकम विनियोजन गर्ने पक्षमा नभए पनि दबाब थेग्न नसकेर विनियोजन गरेको बताए ।

उनले सम्बन्धित मन्त्रालय र वडाअध्यक्षको तहबाट थोरै भए पनि बजेट पार्न दबाब आएको बताए । आगामी दिनमा भने प्राथमिकताका क्षेत्र तोकेर बजेट विनियोजन गर्ने प्रतिवद्धता पनि उनले व्यक्त गरे ।

“सानोसानो बजेट संघबाट भयो भन्नुभएको छ । हो, यसलाई मैले साना–साना नगरौँ नै भनेको । तर, छोटो समय । सम्बन्धित मन्त्रालयबाट आएको दबाब । वडाअध्यक्ष समेत हाम्रो वडामा त अलिकति बजेट छ, राख्नुप¥यो भनेर आए,” उनले भने, “मैले पनि त्यसलाई थेग्न सक्ने अवस्था थिएन । कहाँ कहाँ प्राथमिकताको क्षेत्र छन्, हेरेर गर्ने कुरा आगामी दिनमा मिलाउँदै जान्छौँ ।”

मन्त्री महतले परिणाममुखी बजेट ल्याएको बताए । बजेटले राजस्वको दायरा बढाउने बताउँदै उनले बाह्य निर्भरतालाई कम गर्ने गरी बजेट आएको उल्लेख गरे ।

मन्त्री महतले चालु खर्च घटाउन सक्ने अवस्था नभए पनि धेरै बढ्न नदिने कुरामा आफू सचेत रहेको बताए ।