काठमाडौं । स्वास्थ्य तथा जनसंख्यामन्त्री मोहनबहादुर बस्नेतले तत्काल अनलाइन र टोकन प्रणाली लागु गर्न कोसी अस्पताल प्रशासनलाई निर्देशन दिएका छन् ।

मंगलबार आकस्मिक निरीक्षणका क्रममा विराटनगरस्थित कोसी अस्पताल पुगेका स्वास्थ्य तथा जनसंख्यामन्त्री बस्नेतले ओपिडी र टिकट काउण्टरमा अत्यधिक भिड देखेपछि कोसी अस्पतालको मेडिकल सुपरिण्टेण्डेण्ट डा. रविनराज सिंहलाई सर्वसाधारणहरूलाई सजिलो र सुलभरूपमा स्वास्थ्य सेवा पुर्‍याउन निर्देशन दिए ।

निरीक्षणका क्रममा स्वास्थ्य मन्त्रालयका सचिव डा. रोशन पोखरेल, कोसी प्रदेश स्वास्थ्य मंत्रालयका सचिव डा. सुधा देवकोटा, न्याम्सका उपकुलपति लगायत मंत्रालयका उच्च अधिकारीहरू सहभागी थिए ।

मन्त्री बस्नेतले कोसी अस्पतालको विभिन्न वार्डहरूको निरीक्षण गर्नुका साथै अस्पतालको समस्याबारे जानकारी लिएका थिए । यसैबीच राजधानी बाहिर संघीय सरकार अन्तर्गतको विराटनगर स्थित कोसी अस्पतालमा ३३० बेड निःशुल्क गरिएको छ ।

गरिब, असहाय र विपन्न नागरिकहरूको निःशुल्क उपचार गर्ने सरकारको दायित्व भएकाले मंगलबारदेखि आईसीयू, एचडीयू र क्याबिन बाहेक ३३० बेड निःशुल्क र उपचार पनि निःशुल्क गरिने स्वास्थ्य तथा जनसंख्यामन्त्री मोहन बहादुर बस्नेतले घोषणा गरे ।

निःशुल्क उपचारका लागि बिरामीहरुले स्थानीय पालिका र वडा कार्यालयको सिफारिश तथा विपन्न नागरिक भएको परिचय पत्र ल्याउनुपर्ने कोसी अस्पतालले जनाएको छ । निःशुल्क उपचार गर्दा लाग्ने खर्चको भरपाई स्वास्थ्य तथा जनसंख्या मंत्रालयले दिने बताइएको छ ।