विराटनगर । चालु आर्थिक वर्ष २०७९/०८० मा काठमाडौं महागनरपालिकाले चार अर्ब ८५ करोड एकलाख रुपैयाँ आन्तरिक आय गर्ने लक्ष्य राखेको थियो । राजस्व बाँडफाँट र अनुदानबाहेक असार ७ गतेसम्म काठमाडौं महानगर चार अर्ब ८८ करोड ८७ लाख ३९ हजार खुद आन्तरिक आय जुटाउन सफल भएको छ । जुन लक्ष्यभन्दा तीन करोड ८६ लाख बढी हो ।
राजस्व बाँडफाँट र अनुदानसमेत जोड्ने हो भने चालु आवमा काठमाडौं महानगरपालिकाले कुल आठ अर्ब ४४ करोड २६ लाख पाँचहजार आम्दानी गरेको देखिन्छ ।
आइतबार नगर सभामा पेस गरिएको आर्थिक वर्ष २०८०/०८१ को बजेटमा राजस्व बाँडफाँट र अनुदानसमेतको अनुमानित आयमा ८१ दशमलव ०३ प्रतिशत प्रगति देखिएको छ । यसमा खुद आन्तरिक आयको हिस्सा आधाभन्दा धेरै छ ।
चालु आर्थिक वर्ष विराटनगर महानगरपालिकाको आन्तरिक आय पनि बढेको देखिन्छ । राजस्वका दायरा फराकिलो बनाउँदै खुद आय बढाउन केन्द्रित भएको महानगरले निरन्तर कर सचेतनालगायत अभियान सञ्चालन गरिरहेको छ ।
आगामी आर्थिक वर्षको प्रस्तावित आर्थिक विधेयकमा उल्लेखित करका ३२ शीर्षकमध्ये १४ शीर्षक थप भएका छन् ।
आइतबार उपमेयर शिल्पा निराला कार्कीले नगर सभामा पेस गरेको आव २०८०/०८१ को बजेटमा विराटनगरले जेठ मसान्तसम्म (११ महिनाको अवधिमा) ५१ करोड ६५ लाख ९४ हजार ९०० खुद आन्तरिक आय जुटाउन सफल भएको छ । जुन चालू आवमा महानगरले अनुमान गरेको खुद आम्दानीको ४८ दशमलव ५४ प्रतिशत हो ।
राजस्व बाँडफाँट र अनुदानसमेत जोड्ने हो भने विराटनगरले चालु आवमा दुई अर्ब ८६ करोड ८३ लाख ८० हजार यथार्थ आय गरेको छ । महानगरका मेयर नागेश कोइरालाले आगामी आर्थिक वर्ष खुद आय बढाउन महानगर थप सक्रिय हुने बताए ।
“अनुदानका भरमा मात्र स्थानीय सरकार सञ्चालन भएका छन् भन्ने भाष्य परिवर्तन गर्न हामी आफैँ आफ्नो आम्दानी बढाउने अभियानमा छौँ,” उनले भने ।
पोखरा महनागरपालिकाले ‘कर संकलन अनिवार्य वर्ष’ घोषणा गरी आन्तरिक आय बढाउन विभिन्न अभियान सञ्चालन गर्दै आएको छ । चालु आर्थिक वर्षको असार ८ गतेसम्म पोखराले एक अर्ब १९ करोड ७१ लाख ९२ हजार खुद आम्दानी गरेको छ । विनियोजित बजेटमा महानगरले आन्तरिक स्रोतबाट चार अर्ब ३० करोड १५ लाख बेहोर्ने अनुमान गरेको थियो ।
महानगरकी उपप्रमुख मञ्जुदेवी गुरुङले १३औँ महानगर सभामा आगामी आर्थिक वर्षको बजेट प्रस्तुत गर्दै संघीय अनुदान र प्रदेश सरकारको अनुदानबाहेक आन्तरिक आयबाट दुई अर्ब २७ करोड बेहोर्ने बताएकी छन् ।
पोखराले आगामी आर्थिक वर्षका लागि सात अर्ब १५ करोड रुपैयाँ बजेट ल्याएको छ ।
