काठमाडौं । आईसीसी क्रिकेट विश्वकप छनोटमा वेस्ट इन्डिजविरुद्ध नेपालले अर्धशतक बनाएका आरिफ शेखलाई नवौँ विकेटको रूपमा गुमाएको छ ।

जिम्बाब्वेका राजधानी हरारेस्थित हरारे स्पोर्ट्स क्लबमा जारी खेलको दोस्रो इनिङको ४६औँ ओभरको अन्तिम बलमा आरिफलाई नेपालले नवौँ विकेटको रूपमा गुमाएको हो । आरिफ अल्जारी जासेफको बलमा निकोलस पुरनबाट क्याच भए । नेपाली टिमको खातामा आरिफले ६३ रन थपे । 

जारी खेलको ४६ ओभर समाप्त हुँदा नेपालले नौ विकेट गुमाएर २१२ रन बनाएको छ । 

नेपालले ओपनर कुशल भुर्तेललाई पहिलो विकेट, भीम सार्की र आसिफ शेखलाई तेस्रो विकेटको रुपमा गुमाएको थियो । नेपालका भुर्तेल पाँच, भीम दुई, आसिफ २८, कप्तान रोहितकुमार पौडेल ३०, कुशल मल्ल दुई, दीपेन्द्रसिंह ऐरी २३, गुल्सन ४२ र सन्दीप लामिछाने एक रनमा आउट भएका थिए ।

त्यसअघि टस हारेपछि ब्याटिङमा आएको वेस्ट इन्डिजले निर्धारित ५० ओभरमा सात विकेट गुमाएर ३३९ रनको योगफल खडा गरेको थियो ।

एकदिवसीय अन्तर्राष्ट्रिय क्रिकेटमा नेपाल र वेस्ट इन्डिजबीचको यो पहिलो खेल हो । नेपालले अन्तर्राष्ट्रिय क्रिकेटमा विश्वकप विजेतासँग खेल्न लागेको पनि यो पहिलोपटक हो ।

छनोटमा नेपालको यो तेस्रो खेल हो । नेपालले यसअघि पहिलो खेलमा जिम्बाब्वेसँग आठ विकेटले पराजय बेहोर्दा दोस्रो खेलमा भने अमेरिकाविरुद्ध ६ विकेटको जित दर्ता गरेको थियो ।

यता, वेस्ट इन्डिजको भने छनोटको यो दोस्रो खेल हो । वेस्ट इन्डिजले यसअघि पहिलो खेलमा अमेरिकाविरुद्ध ३९ रनको जित निकालेको थियो ।