काठमाडौं । संयुक्त राज्य अमेरिकाको भ्रमणमा रहेका भारतीय प्रधानमन्त्री नरेन्द्र मोदी त्यहाँका राष्ट्रपति जो बाइडेनसँग संयुक्त पत्रकार सम्मेलनमा सहभागी हुने भएका छन् ।

भारती प्रधानमन्त्री मोदीले बुधबार संयुक्त राष्ट्र संघको मुख्यालयमा आयोजित नवौँ अन्तर्राष्ट्रिय योग दिवस समारोहमा सहभागी भएका थिए ।

भारतीय प्रधानमन्त्री मोदी र बाइडेनले बिहीबार संयुक्तरुपमा पत्रकार सम्मेलन गर्ने र पत्रकारहरूका प्रश्नको जवाफ दिने कार्यक्रम रहेको छ ।

भारतीय प्रधानमन्त्री मोदीले कहिलेकाँही बाहेक मिडियाबाट प्रश्न सायदै लिएका छन् । करिब नौ वर्षअघि प्रधानमन्त्री बनेका उनले भारतमा कुनै पत्रकार सम्मेलनलाई सम्बोधन नगरेको भारतीय सञ्चारमाध्यमले उल्लेख गरेको छ ।

सन् २०१९ को मेमा उनी एक पत्रकार सम्मेलनमा उपस्थित भए पनि प्रश्न नलिएको बताइएको छ ।

राष्ट्रपति बाइडेन र प्रथम महिला जिल बाइडेनको निमन्त्रणामा जुन २१ देखि २४ सम्म अमेरिकाको भ्रमणमा रहेका मोदी बिहीबार राजकीय रात्रिभोजमा सहभागी हुनेछन् ।

आगामी दुई दिनमा दुई नेताले रक्षा सहयोग, साइबर, अन्तरिक्ष, लचिलो आपूर्ति श्रृंखला, जलवायु परिवर्तनलगायतका क्षेत्रमा दीर्घकालीन सम्झौता र छलफल गर्ने भएका छन् । दुई देशबीचको सम्बन्धलाई अझै सुदृढ र गहिरो बनाउने प्रयासका रुपमा मोदीको भ्रमणलाई हेरिएको छ ।