काठमाडौं । पोर्चुगलका कप्तान क्रिस्टियानो रोनाल्डोले अन्तर्राष्ट्रिय फुटबलमा २०० खेल खेल्ने खेलाडीको कीर्तिमान बनाएका छन् । अन्तर्राष्ट्रिय मैत्रीपूर्ण खेलमा आइसल्यान्डलाई १–० ले हराउँदा अन्तिम मिनेटमा निर्णायक गोल गरेका रोनाल्डोले यो खेलसँगै २०० खेलको कोसेढुंगा पार गरेका हुन् ।

सन् २०२४ को युरोपियन च्याम्पियनसिपको छनोटको खेलमा मंगलबार राति रोनाल्डोले आइसल्यान्डविरुद्ध ८९औँ मिनेटमा गोल गरेका थिए । ३८ वर्षीय रोनाल्डोले गोन्कालो इनासिओ असिस्टमा गोल गरेका हुन् ।

रोनाल्डोले यसअघि गएको मार्चमा कुवेतका फरवार्ड बडेर अल–मुतावाको नाममा रहेको सबैभन्दा धेरै अन्तर्राष्ट्रिय खेल खेल्ने खेलाडीको कीर्तिमान तोडेको थिए । रोनाल्डोअघि मुतावाले १९६ अन्तर्राष्ट्रिय खेलसहित सबैभन्दा धेरै अन्तर्राष्ट्रिय खेल खेल्ने खेलाडीको कीर्तिमान बनाएका थिए ।

२०० अन्तर्राष्ट्रिय खेल खेल्ने पहिले खेलाडी बनेका रोनाल्डोलाई खेलअघि गिनिज वर्ल्ड रेकर्डको तर्फबाट प्रमाणपत्र प्रदान गरिएको थियो ।

“मेरो लागि यो अविश्वसनीय र असाधारण उपलब्धि हो,” खेलपछि रोनाल्डोले भने, “र, विजयी गोल गर्नुले यसलाई अझ विशेष बनाएको छ ।”

रोनाल्डोको नाममा सबैभन्दा धेरै अन्तर्राष्ट्रिय गोल गर्ने खेलाडीको कीर्तिमान पनि छ । रोनाल्डोले हालसम्म १२३ अन्तर्राष्ट्रिय गोल गरिसकेका छन् । सन् २००३ मा पोर्चुगलबाट अन्तर्राष्ट्रिय फुटबलमा ‘डेब्यु’ गरेका रोनाल्डो त्यसयता टिमको महत्त्वपूर्ण सदस्य रहँदै आएका छन् ।