काठमाडौं । बीवाईडी गाडीको नेपालका लागि आधिकारिक बिक्रेता साइमेक्सले नयाँ मूल्य सूची सार्वजनिक गरेको छ ।

कम्पनीले बीवाईडी एटीटीओ ३ गाडीलाई तीन भेरियन्टमा उपलब्ध गराउँदै मूल्य सार्वजनिक गरेको हो ।

१०० किलोवाट क्षमताको बीवाईडी एटीटीओ ३ एडभान्स ट्रिम को मूल्य ५५ लाख ९९ हजार तोकेको छ । यसमा ४९.९२ किलोवाट आवरको ब्याट्री प्याक रहेको छ ।

यस्तै, कम्पनीले १०० किलोवाट क्षमताकै बीवाईडी एटीटीओ ३ सुपेरियर ट्रिमको मूल्य ६५ लाख ८८ हजार तोकेको छ । यसमा ६०.४८ किलोवाट आवरको ब्याट्री प्याक रहेको छ ।

तेस्रो १५० किलोवाट क्षमताको बीवाईडी एटीटीओ ३ को मूल्य ८१ लाख ९९ हजार तोकिएको छ । यसमा पनि ६०.४८ किलोवाट आवरको ब्याट्री प्याक नै रहेको छ ।

नयाँ कर दरअघि दुई संस्करण १०० किलोवाट र १५० किलोवाटमा उपलब्ध बीवाईडी एटीटीओ ३ को मूल्य क्रमश: ६४ लाख ९० हजार र ८९ लाख ९० हजार रहेको थियो ।

करको दर २५ प्रतिशत पुगे पनि कम्पनीले मूल्यमा भने सक्दो कम वृद्धि गरेको देखिन्छ ।

बीवाईडीले दिगोपन, कार्यसम्पादन र नवप्रवर्तनलाई प्राथमिकता दिने उच्च गुणस्तरका विद्युतीय सवारी साधनहरू उपलब्ध गराउन समर्पित रहेको जनाएको छ ।

स्वच्छ उर्जाको भविष्य र नेपाल सरकारको दृष्टिकोणलाई समर्थन गर्दै नेपाली बजारमा विद्युतीय गतिशीलतालाई थप पहुँचयोग्य बनाउने लक्ष्य रहेको कम्पनीको भनाइ छ ।