काठमाडौं । नेपाली कांग्रेसका सभापति शेरबहादुर देउवा एक हप्ता लामो बसाइका लागि आज राति सिंगापुर जान लागेका छन् । कांग्रेस केन्द्रीय सदस्य एवं सांसद समेत रहेकी श्रीमती आरजु राणासहित उनी उपचारका लागि त्यसतर्फ जान लागेको बताइएको छ ।

कांग्रेसको प्रचार विभाग प्रमुख मीन विश्वकर्माका अनुसार देउवा नियमित स्वास्थ्य जाँचका लागि सिंगापुर जान लागेका हुन् ।

“आज बेलुका ११ बजे सिंगापुर एयरलाइन्सको उडानबाट सभापतिज्यू सिंगापुर जाँदै हुनुुहुन्छ,” विश्वकर्माले बाह्रखरीसँग भने, “उहाँ नियमित स्वास्थ्य जाँचका लागि जान लाग्नुभएको हो ।”

देउवामा कुनै विशेष रोग नभएको र नियमित स्वास्थ्य जाँचका लागि जान लागेको उनले जानकारी दिए ।

विश्वकर्माका अनुसार देउवा दम्पती असार ६ गते नेपाल फर्कने कार्यतालिका छ ।