काठमाडौं । औषधि उद्योगीहरुले सरकारले सहयोग गरे हाल प्रयोग भइरहेका ७५ देखि ८० प्रतिशत औषधि नेपालमै उत्पादन गर्न सकिने दाबी गरेका छन् । सरकारले कच्चा पदार्थ, उपकरणलगायतमा मात्रै अनुदान दिने हो भने सो मात्रामा औषधि उत्पादन गर्न सकिने नेपाल औषधि उत्पादक संघले जनाएको छ ।

तर, विभिन्न नीतिगत र व्यवहारिक चुनौतीका कारण हाल उद्योगको क्षमताभन्दा ५० प्रतिशत कम औषधि उत्पादन गरिरहेको संघका पूर्वअध्यक्ष दिपक दाहाल बताउँछन् । २०६४ सालदेखि आधारभूत औषधिहरुको मूल्य समायोजन नहुनु, सरकारले पटकपटक गरेका नीतिगत निर्णयहरु कार्यान्वयन नगर्नु, पर्याप्त बजेटको अभाव हुनु तथा भारतीय बजारसँग प्रतिस्पर्धाका कारण उद्योगहरु धरासायी बनेको दाहाल बताउँछन् ।

स्वास्थ्य तथा जनसंख्यामन्त्री मोहनबहादुर बस्नेत भने अन्तर्राष्ट्रिय बजारमा प्रतिस्पर्धा गर्ने खालका औषधि उत्पादन गर्ने हो भने उद्योगलाई टिक्न समस्या नहुुने बताउँछन् । 

“अहिलेलाई भएका उद्योग टिकाउनेतर्फ ध्यान दिऔँ । नाफाघाटा नहेरी औषधिको गुणस्तरमा जोड दिऔँ । त्यति भए उद्योगहरुलाई अप्ठ्यारो पर्दैन,” मन्त्री बस्नेत भन्छन् । भएका निर्णय कार्यान्वयन गराउने तथा नीतिगत सुधारका पक्षमा आफूले सक्दो पहल गर्ने मन्त्री बस्नेतको आश्वासन छ ।

हाल नेपालमा ८३ वटा एलोपेथिक औषधि उद्योगहरु सञ्चालनरत छन् । उद्योगले वार्षिक ३० अर्बको कारोबार गरिरहेको संघको तथ्यांक छ । जसमा सात अर्बको कच्चा पदार्थ आयात हुने गरेको छ ।