काठमाडौं । स्वास्थ्य तथा जनसंख्यामन्त्री मोहनबहादुर बस्नेतले स्वास्थ्य बिमा प्रभावकारी बन्न नसकेको बताएका छन् । आइतबार प्रतिनिधिसभाको बैठकपछि सञ्चारकर्मीहरुसँग कुरा गर्दै उनले स्वास्थ्य बिमा व्यवस्थित गर्न नीतिगत रुपमा नै सुधारको आवश्यकता देखिएको बताए । 

स्वास्थ्य बिमा सरकारी अस्पतालले मात्रै पाउने कि निजीले पनि पाउने भन्ने लडाइँ चलिरहेको उनले बताए । निजी अस्पतालहरुले स्वास्थ्य बिमा आफूले नपाउने भए अस्पताल नै बन्द गर्ने चेतावनी दिएको समेत उनले बताए । 

निजी क्षेत्रहरुले पनि स्वास्थ्य मापदण्डहरु पूरा नगरेको भन्दै सधैँका लागि बन्द गरिदिने चेतावनी दिएपछि निजी क्षेत्र शान्त भएको उनले बताए । स्वास्थ्य बिमा प्रभावकारी बनाउन आफूले स्वास्थ्य र बिमा दुवै बुझेको व्यक्ति खोजे पनि पाउन नसकेको बताए ।

“मैले स्वास्थ्य र बिमा दुवै बुझेको मानिस खोजिरहेको छु, त्यो पाइरहेको छैन । कि स्वास्थ्य बुझेको पाइन्छ, कि बिमा । दुवै बुझेको मान्छे पाउन सकेको छैन,” उनले भने, “स्वास्थ्य बिमा व्यवस्थित गर्न नीतिगत रुपमा नै सुधार गर्नुपर्नेछ । नीतिगत रुपमा नै हामी अघि बढ्नुपर्छ ।”

मन्त्री बस्नेतले स्वास्थ्य बिमाका लागि कार्ययोजना बनाएर अघि बढेको पनि बताए ।