काठमाडौं । चिनियाँ सामाजिक सञ्जालमा अहिले एउटा भिडियो ‘भाइरल’ भइरहेको छ । भिडियोमा एक बालक देखिन्छन् । आमाबुवाको सम्बन्धविच्छेदपछि ती बालक बुवासँग बस्दै आएका थिए । भिडियोमा भने उनी आमा बस्ने फ्ल्याटको ढोकामा कुरेर बसेको देखिएको छ ।

आठ वर्षीय ती बालकलाई आमाबुवा दुवैसँग भेट्ने व्यवस्था मिलाइएको थियो । उनकी बहिनी आमासँग बस्दै आएकी थिइन् ।

उपनाम लिउ भएकी ती बालककी आमाले जुन १ मा बहिनीसँगै बाल दिवस मनाउन छोरालाई बुवाको घरबाट ल्याएकी थिइन् ।

यो दक्षिणपश्चिम चीनको युनान प्रान्तस्थित कुनमिङको घटना हो । दिनभरको समय साथमा बिताएपछि लिउले आफ्नो छोरालाई बुवाको घरमा पुर्‍याएकी थिइन् । त्यसपछि उनी छोरीसँग किनमेल गर्न गएकी थिइन् ।

तर, किनमेलबाट फर्कंदा उनले आफ्नो छोरालाई आफू बस्ने फ्ल्याटको ढोकामा कुरिरहेको पाइन् । छोराले त्यो रात आफूसँगै बस्न चाहेको लिउले बताएकी छन् ।

लामो समयसम्म छोराले कुरेको विषयले आफूलाई ग्लानि भएको पनि उनले बताएकी छन् । त्यसपछि आफू पूर्वश्रीमान्को ठाउँनजिकै बस्न गएको र अहिले छोराले जति बेला चाह्यो, त्यति बेला भेट्न पाउने वातावरण मिलाइएको उनले बताएकी छन् ।