काठमाडौं । नर्वेका फरवार्ड एर्लिङ हाल्यान्डले यूईएफए च्याम्पियन्स लिगको उपाधि जित्न नै आफू म्यान्चेस्टर सिटी आएको बताएका छन् ।

सिटीले शनिबार राति इस्तानबुलमा हुने फाइनलमा इटालियन क्लब इन्टर मिलानको सामना गर्दै छ । सिटी पछिल्लो तीन सिजनको प्रिमियर लिग च्याम्पियन भए पनि हालसम्म च्याम्पियन्स लिगको उपाधि जित्न सकेको छैन । 

यसै सिजनको सुरुवातमा जर्मन क्लब बोरुसिया डर्टमन्डबाट सिटी भित्रिएका हाल्यान्ड पेप ग्वार्डिओलाको टिमका लागि महत्त्वपूर्ण सावित भइरहेका छन् । यस सिजन हाल्यान्डले सिटीका लागि सबैखाले प्रतियोगितामा गरी ५२ गोल गरिसकेका छन् ।

“सिटीले म यहाँ आउनुभन्दा अघि नै लगातार दुईपटक प्रिमियर लिगको उपाधि जितिसकेको थियो । यसकारण उनीहरूलाई कसरी प्रिमियर लिग जित्नुपर्छ भन्ने थाहा छ,” फाइनलअघि हाल्यान्डले भने, “उनीहरूले जित्न बाँकी भनेको च्याम्पियन्स लिग हो । मेरो यो वाक्यलाई सोच्न र पढ्न सक्नुहुन्छ, म यहाँ एक उद्देश्यसहित आएको हुँ ।”

सिटीले प्रिमियर लिगको उपाधि जित्दा हाल्यान्डले ३६ गोल गरेका थिए । गत हप्ता एफए कपको उपाधि जितेको सिटी अब ‘ट्रेबल’ पूरा गर्न च्याम्पियन्स लिग उपाधिको लक्ष्यमा छ । हाल्यान्डले च्याम्पियन्स लिगको उपाधि जित्नु आफ्नो प्रमुख लक्ष्य भएको बताए ।

“मेरो पूरा जीवनमा मैले यसैको बारेमा सोच्दै र सपना बुन्दै आएको छु,” २२ वर्षीय हाल्यान्डले थपे, “मैले सम्झना गर्न सक्ने बेलादेखि नै यो मेरो सपना थियो । अवश्य पनि मैले उपाधिबारे सोचिरहेको छु । हामीले आफ्नो उत्कृष्ट प्रदर्शन गर्न एउटा खेल बाँकी छ । जुन हामीले पछिल्ला धेरै खेलयता गर्दै आएका छौF । र, अबको मुख्य कुरा पनि यसलाई जारी राख्ने मात्र हो ।”