विराटनगर । नेकपा (एमाले) नेतृत्वको सरकारलाई दिएको समर्थन फिर्ता लिने भन्ने विषयमा प्रवेश नै नगरी नेकपा (माओवादी केन्द्र) कोसी प्रदेश संसदीय दलको बैठक सम्पन्न भएको छ ।

सोमबार बसेको बैठकले कोसी प्रदेश सरकारबाट बाहिरिने या नबाहिरिने भन्ने विषयमा निर्णय नगरी सकिएको हो ।माओवादी प्रदेशसभा सदस्य गणेश उप्रेतीका अनुसार सरकारको समर्थन फिर्ता लिने/नलिने भन्ने विषयमा मंगलबार पार्टीका प्रदेशस्तरीय नेताहरूसँग आवश्यक छलफल र परामर्श गर्ने बताए ।

बैठकले माओवादी केन्द्र संसदीय दलका नेता इन्द्रबहादुर आङ्बोको नेतृत्वमा वैकल्पिक सरकार बनाउने पहल गर्न समिति गठन गरेको जनाइएको छ । त्यो समितिले नयाँ सरकार गठनबारे अन्य दलहरूसँग छलफल गर्ने निर्णय भएको हो ।

एमाले नेतृत्वको सरकारलाई जसपाले दिएको समर्थन भने फिर्ता भइसकेको छ । केन्द्रमा सत्ता गठबन्धनमा रहेर पनि माओवादी केन्द्रले कोसीमा भने एमालेलाई सघाइ रहेको छ । एमालेका हिक्मत कार्की नेतृत्वको सरकारलाई गत पुस २४ गते राप्रपा, माओवादी केन्द्र र जसपाले साथ दिएका थिए ।

अहिले माओवादी केन्द्रबाट सरकारमा दूर्गाप्रसाद चापागाईं भौतिक पूर्वाधारमन्त्री र जीवन आचार्य पर्यटन, वन तथा वातावरण मन्त्री छन् । नेपाली कांग्रेस संसदीय दलले भने माओवादीलाई सरकारको फिर्ता हुन लिखित आग्रह गरेको छ । माओवादीका दुई नेताले आज राजीनामा दिने तयारी गरेपनि दलले निर्णय नगरेपति त्यो रोकिएको बताइएको छ ।