काठमाडौं । इल्के गुन्डोगनको दुई गोलप्रेरित म्यानचेस्टर सिटीले फाइनलमा म्यानचेस्टर युनाइटेडलाई २–१ ले हराउँदै एफए कपको उपाधि जितेको छ ।

शनिबारको यो जितसँगै पेप ग्वार्डिओलाको टोली सन् १९९९ पछि ‘ट्रेबल’ जित्ने टिम बन्ने अभियानको अझ एक कदमनजिक पुगेको छ । १९९९ मा एलेक्स फर्गुसनको प्रशिक्षणमा युनाइटेडले ट्रेबल जितेको थियो ।

वेम्बलीमा ३२ वर्षीय मिडफिल्डरले गुन्डोगनले प्रिमियर लिग च्याम्पियनलाई १२ सेकेन्डमै अग्रता दिलाएका थिए । गुन्डोगनको उत्कृष्ट भली एफए कपको इतिहासमा फाइनलमा भएको सबैभन्दा छिटो गोल थियो ।

तर, ३३औँ मिनेटमा कप्तान ब्रुनो फर्नान्डेजले पेनाल्टी सदुपयोग गर्दै युनाइटेडलाई खेलमा फर्काएका थिए । पेनाल्टी बक्समा सिटीका ज्याक ग्रेलिसको ह्यान्ड भएपछि रेफ्रीले भिडियो असिस्टेन्ट रेफ्री (भार)को सहयोगमा युनाइटेडलाई पेनाल्टी दिएका थिए । जसमा फर्नान्डेजले कुनै गल्ती गरेनन् ।

तर पनि ग्वार्डिओलाका टिमलाई फर्नान्डेजको यो गोलले सातौँ एफए कप विजयबाट रोक्न सकेन । दोस्रो हाफको सुरुमा बक्सको छेउबाट गुन्डोगनले पुनः भलिी गोल गरेपछि सिटीले जित हासिल गर्‍यो ।

‘म्यानचेस्टर डर्बी’मा विजयको अर्थ सिटीले अर्को साताको च्याम्पियन्स लिगको फाइनलमा इन्टर मिलानविरुद्ध जित निकाले ट्रेबल च्याम्पियन बन्नेछ ।

च्याम्पियन्स लिगको फाइनल आउँदो आइतबार टर्कीको इस्तानबुलमा हुनेछ ।