काठमाडौं । नेकपा (एमाले)का अध्यक्ष केपी शर्मा ओलीले आफ्नो पार्टी सरकारबाट हटेपछि ‘समृद्ध नेपाल’ भन्ने आँट कसैले पनि गर्न नसकेको बताएका छन् । आफ्नो पार्टी सरकारबाट हटेपछि ‘समृद्ध नेपाल, सुखी नेपाली’ भन्ने आँट कुनै पनि सरकार र प्रधानमन्त्रीले गर्न नसकेको उनले जिकिर गरेका हुन् ।

शनिबार च्यासलस्थित पार्टी केन्द्रीय कार्यालयमा आयोजित एक कार्यक्रममा उनले कुनै व्यक्ति नभई सिंगो समाजलाई माथि उठाउनका लागि आफूहरूले समृद्धिको एजेन्डालाई अघि बढाएको तर्क गरे । छिटो विकास गर्नका लागि आफूहरूले समृद्धिको एजेन्डालाई अघि बढाएको उनको भनाइ थियो ।

“हामी सरकारबाट हटेपछि समृद्ध नेपाल, सुखी नेपाली भन्ने शब्द कुनै सरकार, कुनै प्रधानमन्त्री, कुनै नेता, हाम्रा विपक्षहरू कसैले पनि समृद्ध नेपाल भन्ने आँट गर्दैन । सुखी नेपाली भन्ने आँट गर्दैन । ह्वाट दे वान्ट ? समृद्ध नेपाल भन्ने जसको आँट छैन । भन्न सक्दैन,” उनले भने, “समृद्ध नेपाल भनेको मैले भन्ने गरेको छु नि, यो एउटा खरबपति र अर्कोचाहिँ मजदुर उनीहरू दुईवटाको सम्पत्ति मिलाउँदाखेरि एउटाले वार्षिक ४० अर्ब मुनाफा कमायो भने अर्कोले लसमा छ भने पनि २०÷२० अर्ब कमाएको देखियो नि त ! कमाएको एकजनाले मात्रै हो । एभरेजमा त्यस्तो देखिए पनि बढी त गरिब छ नि । त्यसकारण त्यो रियल डेटा होइन । हामीले गर्न खोजेको मानव विकास हो । समाजको विकास हो । र, सिंगै समाजलाई माथि उठाउने हो । र, मानव समाजलाई मानव बस्न लायकको उत्तरदायी, भविष्यप्रति जिम्मेवार, विनाशकारी होइन, जिम्मेवार विकास । ढिलो होइन, छिटो विकास ।”

अध्यक्ष ओलीले गरिबी छिटो अन्त्य हुने गरी विज्ञान र प्रविधिको प्रयोग गर्न जरुरी रहेको समेत बताए । नेपालले विज्ञान र प्रविधिको प्रयोगमा ध्यानकेन्द्रित गर्नुपर्नेमा उनले जोड दिए ।

“अब हामीले भोकमरीको अन्त्य गर्नु छ । र, गरिबी निवारण गर्नु छ । सबभन्दा फास्ट डेभलपमेन्ट कसरी हुन्छ त भन्दाखेरि हाम्रो १७÷१८ प्रतिशत पपुलेसन अझै पनि गरिबीको रेखामुनि छ । त्यसकारण त्यो पपुलेसन अहिले पनि डेभलपमेन्टको बारेमा सोच्दैन । पेटको बारेमा मात्रै सोच्छ । पेटको बारेमा सोच्नु नपर्ने भएपछि ज्ञान, विज्ञान, प्रविधि र विकासको बारेमा सोच्न थाल्दछ । त्यसकारण रूपान्तरणका लागि टेक्नोलोजी । साइन्सलाई प्रविधिमा कसरी रूपान्तरण गर्ने भन्ने हो,” उनले भने, “त्यसकारण हामी गरिबीबाट मुुक्त हुनु, भोकमरीबाट मुक्त हुनु एकदमै जरुरी छ । र, सिंगै पपुलेसनलाई गर्न जरुरी छ । हामी यो साइन्स एन्ड टेक्नोलोजीको बारेमा किन चर्चा गरिरहेका छौँ ? सबै खालको विकासका लागि यसको जरुरी छ । यो पनि छिटो गरिबी अन्त्य गरौँ । र, सम्पूर्ण पपुलेसनलाई अगाडि बढाऔँ भनेर ।”

कृषि उत्पादनलाई स्वस्थ बनाउने कुरामा पनि प्रविधिलाई उपयोग गर्नुपर्ने उनले बताए ।