विराटनर । भारतबाट विराटनगरको बुधनगरस्थित कस्टम यार्डमा पहिलो कार्गो रेल आइपुग्दै छ । कार्गो रेल भारतको बथनाहास्थित यार्डबाट मध्याह्न १२ बजे नेपालतर्फ आउनेछ । त्यहाँबाट एकीकृत भन्सार जाँच चौकी (आईसीपी)मा आइपुगेपछि नेपाल र भारतका अधिकारीहरूले स्वागत गर्नेछन् ।

नेपाली र भारतीय अधिकारीहरूले रेल र त्यसमा सवार भारतीय अतिथिलाई स्वागत गरेसँगै नेपाल कस्टम यार्डमा औपचारिक कार्यक्रम हुनेछ । उद्योग संगठन मोरङ र मोरङ व्यापार संघका पदाधिकारी स्वागतका लागि आईसीपी पुगेका छन् । बथनाहादेखि बुधनगरसम्मको ट्रयाक चार वर्षअघि परीक्षण गरिएको थियो ।

प्रधानमन्त्री पुष्पकमल दाहाल ‘प्रचण्ड’को भारत भ्रमणको सन्दर्भ पारेर पहिलो कार्गो रेल नेपाल आउन लागेको हो । विराटनगरसम्म कार्गोसहितको रेल्वे सेवा सुरु गर्न विगत लामो समयदेखि नेपाली उद्योगी, व्यवसायीले माग गर्दै आएका थिए ।

उद्योग संगठन मोरङका निवर्तमान अध्यक्ष सुयष प्याकुरेलले औद्योगिक कच्चापदार्थ, फलामका बिलेटलगायत सामग्री बोकेर रेल नेपाल आइपुग्नु कोसी प्रदेशवासीकै लागि गौरवको विषय भएको बताए । उनले भने, “विगत लामो समयदेखिको हाम्रो माग बल्ल पूरा भएको छ ।”

रेल्बे यार्डसम्म कार्गो रेल नआउँदा औद्योगिक कच्चापदार्थ आयात र तयारी वस्तु निकासी गर्दा उद्योगीले महँगो मूल्य तिर्नुपर्ने बाध्यता थियो । यार्डसम्म रेल्वेमा सामान आयात गर्ने व्यवस्था भएपछि औद्योगिक कच्चापदार्थसहितका सामग्री ल्याउन सहज हुनेछ ।

बथनाहादेखि विराटनगरसम्म रेल्वेको काम सुरु भएको १२ वर्ष भयो । मोरङको कटहरीसम्मको १८.६ किलोमिटर लम्बाइ ब्रोडगेज रेलमार्ग भारत सरकारको सहयोगमा निर्माणाधीन छ । करिब चार अर्ब भारतीय लगानीमा भारतको इरकोन कम्पनीले सन् २०११ मा रेलको ट्रयाक बिछ्याउनेलगायत काम सुरु गरेको थियो । सन् २०१७ मै निर्माण कार्य सम्पन्न भइसक्नुपर्ने थियो । हालसम्म विराटनगर आईसीपीसम्मको आठ किलोमिटर क्षेत्रमा रेल चल्न सक्ने संरचना भने तयार भइसकेको छ ।

उद्योग संगठन मोरङका अध्यक्ष राकेश सुरानाले रेल्वे पूर्ण रूपमा सञ्चालन भए यो क्षेत्रको औद्योगिक विकासमा थप टेवा पुग्ने बताए । सबै संरचना तयार गर्न नेपालले ११९ बिघा जमिन अधिग्रहण गरेर निर्माण कम्पनीलाई हस्तान्तरण गर्नुपर्ने सहमति थियो । तर, कटहरी गाउँपालिका–१ का २२ जग्गाधनीले ६ बिघा जमिन अधिग्रहण गर्न नदिने भन्दै सर्वोच्च अदालतमा मुद्दा हालेका छन् । मुआब्जासम्बन्धी मूल्य कम भएको भन्दै स्थानीयवासी रुष्ट छन् ।