काठमाडौं । पूर्वअर्थमन्त्री डा. युवराज खतिवडाले विद्युतीय सवारी (ईभी)मा लगाइएको कर अव्यावहारिक भएको बताएका छन् । बुधबार नेपाल आर्थिक पत्रकार समाज (सेजन)ले आयोजना गरेको ‘पोष्ट–बजेट डिस्कसन’ कार्यक्रममा बोल्दै डा. खतिवडाले सस्ता ईभीमा कर बढाइए पनि महँगामा भने कर हेरफेर नगरेको भए उपयुक्त हुने बताए ।

“ईभीको विषयमा एउटा छुट्टै बहस गरौँला । अलिकति उहाँले एउटा काम चाहिँ नगरेको भए हुन्थ्यो । तलकालाई बढाएको भए पनि माथिकालाई लाग्दै आएको कर नघाएको भए हुन्थ्यो भन्ने मलाई पनि लागेको छ,” उनले भने, “किनभने त्यो आवश्यक पनि छैन । अहिलेको आवश्यकता भनेको नेपालीहरू अहिले पनि गुइँठा बालेर बसेका छन् । प्लाष्टिकका झोला बालेर बसेका छन् । यो परिवारको बारेमा राज्यले सोच्नुपर्छ । राजस्व उठाएर यो परिवारका काम गरौँ ।”

गाडीहरूमा लगाइएको विद्युतीय गाडीको भन्सार बढाउन वा घटाउन अटोमोबाइलवालाको लबिङ हुने उनले बताए ।

बिजुली गाडीबाट अहिले हामीले कति राजस्व गुमाइरहेका छौँ, कति विदेशी मुद्रा गुमाइरहेका छौँ, त्यसको लाभ कसले लिइरहेको छ ? त्यसको उत्तर चाहिँ अहिले चाहिने उनको भनाइ छ ।

कति मूल्यको गाडी ल्याउँदा कति विद्युत् खपत गर्छौँ, कति विदेशी मुद्रा खर्च गर्छाैँ र त्यो विदेशी मुद्रा खर्च गरेपछि अर्काे ठाउँमा राजस्व कति गुमाउँदै छौँ, त्यसमा पनि सरकारले ध्यान दिनुपर्ने उनले बताए । यो सबै गरिरहँदा हामीले पेट्रोलियम पदार्थको खपत कम गरिरहेका छौँ कि छैनौँ भनेर पनि ध्यान दिनुपर्ने उनले बताए ।

ईभीको विषयमा थप छलफल गर्न जरुरत रहेको पनि उनले बताए ।