काठमाडौं । नेपाली कांग्रेसका सांसद प्रदीप पौडेलले सार्वजनिक जग्गाको दुरुपयोग हुन नदिन सरकारसँग आग्रह गरेका छन् ।

सोमबार काठमाडौंमा वामपन्थी नेता निर्मल लामा प्रतिष्ठानका नाममा छुट्टयाइएका जग्गामा वृक्षरोपण गर्दै उनले सार्वजनिक जग्गा ‘नजिकका मानिस’लाई दिन नहुनेमा जोड दिए । सरकारले नजिकका मानिसको स्वार्थ पूरा गर्नका लागि सार्वजनिक जग्गा ‘लिज’मा दिए आफू विरोधमा उत्रिने उनले चेतावनी दिए ।

सार्वजनिक जग्गाको संरक्षण कसरी गर्ने भन्ने बारेमा सरकारले स्पष्ट नीति ल्याउनुपर्ने उनले बताए । काठमाडौं क्षेत्र नम्बर–५ मा सार्वजनिक जग्गा खोजेर त्यसको संरक्षणका लागि आफूले वृक्षरोपण गर्ने उनले उल्लेख गरे । काठमाडौंको महँगो जग्गा व्यक्तिले अतिक्रमण गर्ने स्थितिलाई अन्त्य गर्नुपर्ने उनको भनाइ छ ।

सांसद पौडेलले निर्मल लामा प्रतिष्ठानको आवरणमा व्यापारिक केन्द्र बनाउन दिन नसकिने स्पष्ट पारे । केही मानिसको स्वार्थ पूरा गर्न लामाको सम्मानित नाम बदनाम नगर्न उनले चेतावनी समेत दिए ।

सांसद पौडेलले वृक्षरोपण गरेको उक्त जग्गा कांग्रेस सभापति शेरबहादुर देउवा नेतृत्वको अघिल्लो सरकारले निर्मल लामा प्रतिष्ठानलाई दिने निर्णय गरेको थियो ।