विराटनगर । कोसी प्रदेशसभाको बजेट अधिवेशन आइतबार (आज) दिउँसो २ बजेदेखि सुरु हुँदै छ । तर, प्रदेशसभा सदस्यहरू पाँच घण्टाअघि नै प्रदेशसभा सचिवालयमा पुगेका छन् ।
कोसी नामकरणको विरोधमा आन्दोलनमा उत्रिएका पहिचानवादीका कारण हुन सक्ने सम्भावित झडप र अवरोधलाई मध्यनजर गर्दै सांसदहरू बिहानै प्रदेशसभा सचिवालयमा पुगेका हुन् । कडा सुरक्षाबीच सांसदहरू बिहान ९ बजेदेखि नै प्रदेशसभा सचिवालयमा पुगेका थिए ।
सत्तारूढ दल नेकपा (एमाले) संसदीय दलको बैठक समेत बिहानै राखिएको थियो । सोही कारण सांसदहरू बिहानै प्रदेशसभा सचिवालयमा पुगेका हुन् ।
“बजेट अधिवेशन र अहिलेको राजनीतिक परिदृश्यको विषयमा दलको बैठक राखिएको हो,” एमाले संसदीय दल कोसी प्रदेशका प्रमुख सचेतक रेवतीरमण भण्डारीले बाह्रखरीसित भने ।
विराटनगरको देवकोटाचोकनजिक बिहानैदेखि आन्दोलनकारीले प्रदर्शन गर्ने तयारी गरेका थिए । त्यसक्रममा १३ जनाभन्दा धेरै प्रदर्शनकारी पक्राउ परिसकेका छन् ।
सभाको बैठकमा भाग लिन जाने सांसदहरूको सुरक्षाका लागि अस्पतालचोकदेखि देवकोटाचोक र सिद्धार्थचोकदेखि देवकोटाचोक पश्चिमको सडकबाट अरू सर्वसाधारण एवं सवारीसाधनको आवतजावतमा रोक लगाइएको छ ।
बजेट अधिवेशन सञ्चालनमा अवरोध गर्ने गरी प्रदर्शन हुन सक्ने भन्दै जिल्ला प्रशासन कार्यालय मोरङले केही क्षेत्रमा निषेधाज्ञा जारी गरेको छ । प्रदेशसभा भवन आसपास, मुख्यमन्त्रीको कार्यालय रहेको रोडशेषचोक र मुख्यमन्त्रीको निवासलगायत क्षेत्रमा सुरक्षा व्यवस्था कडा पारिएको मोरङका प्रहरी प्रमुख एवं एसपी दीपक पोखरेलले जानकारी दिए ।
गएको फागुन १७ गते प्रदेश नम्बर–१ को नाम कोसी राखिएसँगै पहिचानवादीले विरोध गर्दै आएका छन् । उनीहरूले प्रदेश राजधानी विराटनगरकेन्द्रित आन्दोलन अघि बढाएका छन् ।
आजको प्रदेशसभा बैठकमा शून्य समय, दलका नेताको सम्बोधन र केही ऐन संशोधनसम्बन्धी विधेयक पेस हुने कार्यसूची छ ।
