विराटनगर । उद्योग संगठन मोरङको नवनिर्वाचित कार्यसमितिको पदस्थापन सम्पन्न भएको छ ।

शनिबार संगठनको कार्यालयमा नवनिर्वाचित अध्यक्ष राकेश सुरानालाई निवर्तमान अध्यक्ष सुयष प्याकुरेलले पद हस्तान्तरण गरेसँगै पदस्थापन गरिएको हो ।

अध्यक्ष सुरानालाई निर्वाचन समितिका संयोजक सूर्य विमलीले पद तथा गोपनीयताको शपथ गराए । त्यसपछि अध्यक्ष सुरानाले कार्यसमितिमा तीन सदस्यहरू क्रमशः प्रतिभा रिजाल, जयेन्द्र शर्मा र सिद्धार्थ काबरालाई मनोनीत गरे र शपथ खुवाए ।

कार्यक्रममा नवनिर्वाचित अध्यक्ष सुरानाले आफ्नो कार्यकालभर सम्पन्न गर्ने गरी तयार गरेको २१ बुँदे कार्ययोजना तथा प्रतिबद्धता सार्वजनिक गरे । उनले अघिल्लो कार्यसमितिले सुरु गरेका र पूरा हुन बाँकी रहेका कार्यलाई आफ्नो कार्यकालमा पूर्णता दिने प्रतिबद्धता जनाए ।

कार्यक्रममा कोसी प्रदेशका मुख्यमन्त्री हिक्मत कार्कीले प्रदेशस्थित औद्योगिक क्षेत्रको विकासमा टेवा दिन सरकारले भरमग्दुर प्रयास गर्ने बताए । उनले भने, “निजी क्षेत्रसँगको सहकार्यमा नै आर्थिक विकास सम्भव हुने भएकोले हामी औद्योगिक र आर्थिक विकासको लागि सहकार्य गर्न तयार छौँ ।”