काठमाडौं । नेकपा (एमाले)माथि भ्रष्टाचारको तथ्यहीन आरोप लगाइएको भन्दै राष्ट्रिय युवा संघमा आबद्ध नेता–कार्यकर्ताले काठमाडौंमा विरोध प्रदर्शन गरेका छन् ।

स्वास्थ्य सामग्रीमा भ्रष्टाचार र पशुपतिनाथ मन्दिरको जलहरीका विषयमा एमालेमाथि तथ्यहीन आरोप लगाइएको भन्दै शनिबार बानेश्वरमा मसाल जुलुस प्रदर्शन गरिएको हो ।

सत्ता गठबन्धनमा आबद्ध नेताहरूको आधारहीन, भ्रामक तथा आपत्तिजनक अभिव्यक्ति स्वीकार्य नहुने भन्दै विरोध प्रदर्शन गरिएको युवा संघले जनाएको छ ।

प्रदर्शनमा सहभागीले ‘जलहरीको सुन पशुपतिनाथमा छ, लुटेको सुन कहाँ छ ?’, ‘लडाकु घोटाला छानबिन गर’ लगायत नारा लेखिएका प्लेकार्ड प्रदर्शन गरेका थिए । उनीहरूले सरकारविरुद्ध नाराबाजी गरेका थिए ।