काठमाडौं । प्रतिनिधिसभा बैठक सञ्चालनका लागि सत्तापक्ष र प्रतिपक्ष लचक हुन सकेका छैनन् । शुक्रबारका मध्याह्न साढे १२ बजेदेखि स्थगित भएको बैठक दुईपटक समय तोक्दा पनि बस्न सकेको छैन ।

गएको जेठ १० गतेको प्रतिनिधिसभा बैठकमा नेकपा (माओवादी केन्द्र)का सांसद लेखनाथ दाहालले नेकपा (एमाले) अध्यक्ष केपी शर्मा ओलीको सरकारका बेला पशुपतिमा पित्तलको जलहरी चढाएर भ्रष्टाचार गरेको आरोप लगाएका थिए । सोही विषयमा आरोप पुष्टि गर्न वा माफी माग्न भन्दै एमालेले विरोध गरेपछि बैठक स्थगित भएको थियो ।

उक्त बैठक बस्न नसकेपछि ३ बजे बस्ने गरी संसद् सचिवालयले सूचना जारी गरेको थियो । बैठकका लागि सहमति जुट्न नसकेपछि समय सारेर बेलुका ६ बजेका लागि बैठकको सूचना जारी भएको थियो ।

अहिले सभामुख देवराज घिमिरेले सर्वदलीय बैठक राखेर छलफल गरिरहेका छन् । तर, सहमति जुट्न सकेको छैन ।

बैठकमा सहभागी एक सांसदका अनुसार एमाले मान्न तयार छैन । सत्ता गठबन्धनले संसदीय छानबिन समिति बनाउनुपर्ने र छानबिन गर्नुपर्नेमा जोड दिएको छ । एमाले भने प्रधानमन्त्रीले जवाफ दिनुपर्ने वा रोस्टममा उभिएर सांसद दाहालले माफी माग्नुपर्ने र रेकर्डबाट उक्त अभिव्यक्ति हटाइनुपर्ने माग गरिहरहेको छ ।

यसैबीच सत्ता गठबन्धनमा आवद्ध दलहरूले यो विषय अख्तियार दुरुपयोग अनुसन्धान आयोगमा पुगेको भन्दै सरकारले माफी माग्ने वा प्रतिकृया दिन नमिल्ने अड्डी कसेर बसेका छन् ।

“उहाँहरूले सरकारले जवाफ दिनुपर्छ भनेपछि हामीले यो विषय अख्तियारमा भएकाले बोल्न नमिल्ने भनेका छौँ,” ती सांसदले बाह्रखरीसँग भने ।

यो विषयमा गतवर्ष नै अख्तियारमा उजुरी परेको छ । त्यसमा अख्तियारले छानबिनको प्रगति सार्वजनिक गरेको छैन ।

ती नेताका अनुसार एमालेले भने प्रधानमन्त्रीले या त सुन हो कि पित्तल हो संसद्मा स्पष्ट भन्नुपर्ने नभए सांसद दाहालले रोस्टममा उभिएर माफी माग्नुपर्ने अडान छाडेको छैन ।