काठमाडौं । बनेपामा ‘आगन्तुक रिसोर्ट’ सञ्चालनमा आएको तीन वर्ष पूरा भएको छ । चारतारेको मान्यता पाएको रिसोर्ट ३१ डिसेम्बर २०१९ मा सञ्चालन आएको थियो ।

रिसोर्टले आन्तरिक तथा बाह्य पर्यटकलाई लक्षित गरेको छ । सरकारले घोषणा गरेको ‘भिजिट नेपाल, २०२०’लाई लक्षित गरेर रिसोर्ट सञ्चालनमा आएको थियो ।

तर, रिसोर्ट सञ्चालनमा आएको केही समयमै कोरोना महामारी सुरु भयो । पर्यटन क्षेत्र ठप्प बन्यो । जसले गर्दा सुरुवातमै रिसोर्टको व्यापारमा धक्का लाग्यो । तर, कोरोना महामारीको प्रभाव कम भएसँगै पर्यटन क्षेत्रको चहलपहल बढ्दै गयो र रिसोर्टको व्यापार पनि सुधार हुँदै गयो । अहिले सन्तोषजनक व्यापार भइरहेको रिसोर्टका रिसिडेन्ट म्यानेजर विमल पौड्याल बताउँछन् ।

रिसोर्ट ७५ रोपनी क्षेत्रफलमा फैलिएको छ । रिसोर्टमा ५२ वटा रुम छन् । जसमा चारवटा स्विट, चारवटा मिनी स्विट, ४४ वटा डिलक्स रुम सञ्चालनमा छन् । स्पा पनि चाँडै सञ्चालनमा ल्याउने रिसोर्टको तयारी छ । 

रिसोर्टमा रुम र ब्रेकफास्टको प्याकेज ८ हजारदेखि २० हजारसम्म उपलब्ध छ । रुमसहित ब्रेकफास्ट र डिनरको प्याकेज १० हजारदेखि ३० हजारसम्म उपलब्ध छ ।

रिसोर्टका रिसिडेन्ट म्यानेजर पौड्यालका अनुसार थप २० वटा रुम चाँडै सञ्चालनमा ल्याउने तयारी गरिएको छ । अहिले रिसोर्टमा आवास, स्विमिङ पुल, फिटनेस सेन्टर, दुईवटा रेस्टुरेन्ट र बार सञ्चालनमा छन् ।

विभिन्न कार्यक्रम तथा मिटिङका दुईवटा ठूला र दुईवटा साना मिटिङ हल छन् । ठूला मिटिङ हलको क्षमता २८० जना रहेको छ भने सानो मिटिङ हलको क्षमता १२० रहेको छ ।

रिसोर्टबाट हाइकिङ रुट पनि छ । पाँच मिनेट हिँडेपछि नजिकै भ्यू टावर छ । जहाँबाट वरिपरिको रमणी य दृष्य अवलोकन गर्न सकिन्छ । रिसोर्टबाट गोसाइनाथ नजिकै पर्छ । साथै, चन्देश्वरी मन्दीर पनौती गाउँ र स्थानीय गाउँबस्तीको दृश्यावलोकन गर्न सकिन्छ । रिसोर्टबाट देखिने हिमशृङ्खला पनि देखिन्छ ।

अहिले रिसोर्टले ७० जनालाई रोजगारी दिएको छ ।

क्यासिनो सञ्चालनको तयारी
रिसिडेन्ट म्यानेजर पौड्यालका अनुसार रिसोर्टमा अहिलेसम्म दुई अर्ब खर्च भइसकेको छ । अब पूर्ण क्षमतामा सञ्चालनमा ल्याएर रिसोर्टलाई पाँचतारे मान्यताप्राप्त बनाउने तयारी भइरहेको छ । 

विदेशी पर्यटकलाई लक्षित गरेर क्यासिनो सञ्चालन गर्ने लक्ष्य रहेको लगानीकर्ता कृष्ण ज्ञवालीले बताए । अहिले रिसोर्ट आउने ग्राहकहरू सकारात्मक प्रतिक्रिया दिइरहेकाले हौसला थपिएको ज्ञवाली बताउँछन् । 

“हाम्रो रिसोर्टमा आउनुभएका ग्राहकहरूबाट एकदमै सकारात्मक प्रतिक्रिया प्राप्त भएको छ । जसले गर्दा हामीलाई अघि बढ्न थप हौसला मिलेको छ,” ज्ञवालीले भने ।