काठमाडौं । लगातार दुई खेल जितेर सेमिफाइनलमा स्थान बनाइसकेको नेपाली महिला भलिबल टिमले बुधबार सेन्ट्रल एसियन भलिबल एसोसिएसन (काभा) महिला भलिबल च्यालेन्ज कपमा बलियो प्रतिद्वन्द्वी भारतविरुद्ध प्रतिस्पर्धा गर्नेछ ।

समूह ‘ए’बाट भारत र नेपाल दुवैले अन्तिम चारमा स्थान पक्का गरिसकेका छन् । आजको नतिजाले समूहको विजेता र उपविजेता टुंगो लाग्नेछ । त्यसकारण पनि आजको खेल दुवै टिमका लागि महत्त्वपूर्ण हुनेछ । किनकि, विजेता टिमले सेमिफाइनलमा तुलनात्मक रुपमा केही कमजोर टिमलाई प्रतिस्पर्धीका रुपमा पाउन सक्छ ।

समूह विजेताले अर्को समूहको उपाविजेता टिमसँग प्रतिस्पर्धा गर्नेछ । त्यसकारण पनि आज दुवै टिम हार्न चाहँदैनन् । 

नेपालले भारतलाई आधिकारिक प्रतियोगितामा अहिलेसम्म हराउन सकेको छैन । २०१९ मा नेपालमै सम्पन्न १३औँ दक्षिण एसियाली खेलुकद (साग)को फाइनलमा नेपालले भारतसँग पाँच सेटसम्म खेलेको थियो । भारतविरुद्ध नेपाली टिमको त्यही नै अहिलेसम्मको सबैभन्दा कडा प्रतिस्पर्धा हो । र, नेपाली टिमले त्यसपछि भारतसँग प्रतिस्पर्धा गर्न लागेको पनि यो पहिलोपटक हो ।

नेपालकी कप्तान अरूणा शाहीले आज भारतविरुद्ध दबाबमुक्त भएर खेल्ने बताइन् । उनले थपिन्, ‘‘त्यतिबेला हामी पाँच सेटसम्म पुगेर हारेका थियौँ । अहिले हामीलाई त्यस हारको बदला लिने मौका छ । आज हामी दबाबमुक्त भएर खेल्नेछौँ । फ्री भएर खेल्ने हो ।’’

साढे तीन वर्षअघि काठमाडौंमा सम्पन्न दक्षिण एसियाली खेलकुद (साग)मा नेपालले भारतसँग पाँच सेटको नतिजामा हारेको थियो । जुन अहिलेसम्मको सबैभन्दा राम्रो नतिजा हो । त्यतिबेला सागको तयारीका लागि नेपालले थाइल्यान्डमा झण्डै दुई साताको तयारी गरेको थियो भने थाइल्यान्डपछि बंगलादेशमा काभा खेलेर फर्किएको थियो ।

यसपटक प्रतियोगिताका लागि नेपालले तीन महिनादेखि तयारी गरिरहेको छ । तर, त्यो तयारी आन्तरिक मात्र छ । यसबीचमा नेपाली टिमले कुनै पनि विदेशी टिमसँग मैत्रीपूर्ण वा प्रतिस्पर्धात्मक खेल खेलेको छैन । नेपाली टिम पछिल्लो समय बेल्जियमका प्रशिक्षक यान डी ब्रान्ड्टको प्रशिक्षणमा छ । प्रशिक्षक ब्रान्ड्टले नेपाल भारतसँग पराजित भए पनि अहिलेसम्म आफू नहारेको बताए ।

उनले थपे, ‘‘‘नेपालले भारतसँग हा¥यो होला, तर मैले हारेको छैन । बितेको कुरा बितिसक्यो । अहिले भारतको टिममा पनि परिवर्तन भएको होला र हाम्रो टिममा पनि केही परिवर्तन भएको छ । त्यसैले भोलि नयाँ खेल हुनेछ । बंगलादेशविरुद्ध हाम्रो सेटिङमा केही समस्या देखियो । कीर्गिस्तानविरुद्ध सामान्य गल्तीहरू धेरै भएका थिए । त्यसरी नै खेल्यौँ भने भारतविरुद्ध कठिन हुनेछ । भारत शारीरिक रुपमा बलियो छ । त्यसकारण हामीले प्राविधिक रुपमा चातूर्यपूर्वक खेल्यौँ भने भारतलाई हराउन नसक्ने भन्ने हुँदैन ।”

आजको खेल

१. कीर्तिस्तानविरुद्ध बंगलादेश    
२. उज्वेकिस्तानविरुद्ध काजकिस्तान
३. नेपालविरुद्ध भारत
४. श्रीलंकाविरुद्ध माल्दिभ्स