काठमाडौं । राष्ट्रिय स्वतन्त्र पार्टी (रास्वपा)का सांसद विराजभक्त श्रेष्ठले नीति तथा कार्यक्रमको गति र गन्तव्य दुवै नभएको बताएका छन् । नीति तथा कार्यक्रम कर्मकाण्डीको निरन्तरताबाहेक केही नभएको उनको भनाइ छ ।

मंगलबार प्रतिनिधिसभा बैठकमा सरकारको वार्षिक नीति तथा कार्यक्रममाथिको छलफलका क्रममा उनले आर्थिक संकटमा आठ कारण भएको बताए । अहिले विकासको नाममा विनाश भइरहेको उनले उल्लेख गरे ।

उनले विकासका विषयमा सदनले पुनः व्याख्या गर्न जरुरी रहेकामा जोड दिए । “व्यवस्थापन नै विकास हो भन्ने किन बुझ्दैनन् ?,” उनले भने, “दिगो विकास भनेको अर्थतन्त्र, पर्यावरण र समाजको सन्तुलन हो । यो तीनवटाको सन्तुलन नै दिगो विकास हो । यसमा ध्यान जाओस् ।”

बजेट भाषण मात्र नभई जनताको चुलोमा रासन भएर पुगोस् भन्ने आफ्नो चाहना रहेको उनले बताए । उनले वर्तमान आर्थिक संकटका आठ कारण बुँदामा रूपमा प्रस्तुत गरेका छन् ।

“आर्थिक संकटका कारणहरू विश्वव्यापी ऋण, व्यापार असन्तुलन र व्यापार घाटा, राजनीतिक र नीतिगत अस्थिरता, न्यून बचत र पुँजीको अनुत्पादक क्षेत्रमा लगानी, विनिमय दरमा उतारचढाव, ब्याजदरमा वृद्धि, कमजोर व्यावसायिक वातावरण र लगानीको पलायन, भ्रष्टाचार हुन्,” उनले भने ।

सांसद श्रेष्ठले यो सुधारका लागि एक दर्जनभन्दा बढी सुझावका बुँदा पनि प्रस्तुत गरेका छन् ।

“वित्तीय पारदर्शितामा सुधार, वित्तीय प्रोत्साहन लागु गर्ने, सार्वजनिक पूर्वाधारमा लगानी गर्ने, वित्तीय साक्षरतामा जोड दिने, सहकारी क्षेत्रको सुधारलगायत रहेका छन्,” उनले भने ।

सांसद श्रेष्ठले नीति तथा कार्यक्रमको छलफलका क्रममा हिलो छ्यापाछ्यापबाहेक रचनात्मक बहस नभएको बताए ।

“एकले अर्कोलाई गाली गरेको, हिलो छ्यापेको देखियो । आफैँ पहिला सरकारमा भएको बेला किन नगरेको ?,” उनले भने, “बच्चा बेलामा सर्पले नै सर्पको खुट्टा देख्छ भनेको सुनिन्थ्यो, के भनेको होला भन्ने लाग्थ्यो, यो संसद्मा आएपछि देखिन थाल्यो । एकले अर्कालाई गाली गरेको छ, तर गरेको चाहिँ केही छैन ।”