काठमाडौं । बंगालको खाडीमा विकसित भएको ‘मोखा’ नामक शक्तिशाली चक्रवातको उल्लेखनीय असर नेपालमा परेको छैन । उक्त चक्रवात बंगलादेश तथा म्यानमारको क्षेत्रमा प्रवेश गरिसकेको र कमजोर भइरहेको हुनाले नेपालमा यसको उल्लेखनीय प्रभाव नरहने जल तथा मौसम विज्ञान विभागले जनाएको छ । 

हाल देशमा  पश्चिमी वायुको साथै स्थानीय वायुको सामान्य प्रभाव रहेको छ । आज बिहान कोसी, कर्णाली र सुदूरपश्चिम प्रदेशमा आंशिकदेखि सामान्य बदली रहेको छ । बाँकी भू–भागमा मौसम सामान्यतया सफा रहेको विभागको भनाइ छ । 

आज दिउँसो देशको पहाडी भू–भागमा आंशिकदेखि सामान्य बदली रहने विभागले जनाएको छ । बाँकी भू–भागमा आंशिक बदलीदेखि मौसम सामान्यतया सफा रहनेछ । कोसी, वाग्मती, गण्डकी, कर्णाली र सुदूरपश्चिम प्रदेशका पहाडी भू–भागका केही स्थानमा मेघगर्जन र चट्याङसहित हल्का वर्षाको सम्भावना रहेको विभागको भनाइ छ ।

आज राति देशका पहाडी भू–भागमा आंशिक बदली रहने विभागको भनाइ छ । बाँकी भू–भागको मौसम सामान्यतया सफा रहनेछ । कोसी प्रदेशलगायत वाग्मती प्रदेश र गण्डकी प्रदेशको पहाडी भू–भागका थोरै स्थानमा मेघगर्जनसहित क्षणिक वर्षाको सम्भावना रहेको छ ।