काठमाडौं । पाकिस्तानमा जारी व्यापक विरोध आन्दोलनका बीच बन्द गरिएको इन्टरनेट सेवा फेरि सञ्चालनमा आएको छ । स्थानीय सञ्चारमाध्यमका अनुसार शुक्रबार रातिपछि मोबाइल डाटा सेवा पुनःस्थापित भए पनि मुख्य सामाजिक सञ्जाल प्लेटफर्महरूमा पहुँच भने प्रतिबन्धित नै रहेको छ । 

पीटीआईका अध्यक्ष इमरान खानको गिरफ्तारीपछि पाकिस्तानमा हिंसात्मक विरोध प्रदर्शन चर्किएको थियो । त्यसपछि पाकिस्तान सरकारले मे ९ मा ट्विटर, फेसबुक र युट्युबमाथि प्रतिबन्धसहित इन्टरनेट सेवामा रोक लगाएको थियो ।

सबैरितबाट दबाब बढेसँगै चार दिनपछि शुक्रबार पाकिस्तानको गृह मन्त्रालयले पाकिस्तान दूरसञ्चार प्राधिकरण (पीटीए)लाई प्रतिबन्ध हटाउन आदेश दिएको थियो ।

राति करिब १० बजेपछि मोबाइल इन्टरनेट सेवा सुचारु भए पनि ट्विटर र अन्य सामाजिक सञ्जालका वेबसाइटहरूमा भने शनिबारसमेत पहुँच दिइएको छैन ।

मन्त्रालयले नियामकलाई यी प्लेटफर्महरुको पहुँच खुला नगर्न निर्देशन दिएका कारण प्रतिबन्धित नै रहेको अधिकारीहरुले बताएका छन् ।