काठमाडौं । गत महिना अमेरिकामा सुपुर्दगी गरिएका एक बेलायती नागरिकले सामाजिक सञ्जालको इतिहासकै सबैभन्दा ठूलो ह्याकिङ गरेको स्वीकार गरेका छन् ।

सन् २०२० को जुलाईमा संयुक्त राज्य अमेरिकाका पूर्वराष्ट्रपती बराक ओबामा, हालका राष्ट्रपति जो बाइडेनलगायत १३० हाइप्रोफाइल व्यक्तिहरुको अकाउन्ट ह्याक भएको थियो ।

प्लगवाकजो भनेर चिनिने २३ वर्षीय जोसेफ जेम्स ओकनरलाई यो ह्याकिङको आरोपमा ७० वर्षभन्दा बढीको जेल सजाय तोकिएको छ ।

२०२० को जुलाईको ह्याकिङ बिटक्वाइन घोटालाको हिस्साका रुपमा रहेको थियो । ओकोनरले दर्जनौँ ट्विटर अकाउन्टहरु आफ्नो नियन्त्रणमा लिएका थिए । ती सबै अकाउन्टबाट उनले पैसा दोब्बर गरिदिने भन्दै एक अकाउन्टमा बिटक्वाइन पठाउन अनुरोध गरी ट्विट गरेका थिए ।

ओकोनरसहित यो घटनामा अन्य तीनजना पुरुषहरु पनि संलग्न रहेका थिए । अमेरिकी किशोर ग्राहम इभान क्लार्कले २०२१ मा दोष स्वीकार गरेका थिए । अमेरिकाकै निमा फाजेली र बेलायतका मेसन शेपर्डलाई पनि अभियोग लागेको थियो ।

लाखौं फलोअर रहेका अकाउन्टहरुबाट ट्विट गरिँदा ३५ करोडभन्दा बढी प्रयोगकर्ताले ती ट्विट देखेको र हजारौं ठगिएको बताइएको छ । यो ह्याकले त्यतिबेला ट्विटरको सुरक्षा कति नाजुक थियो भन्ने देखाएको थियो ।