काठमाडौं । अर्थशास्त्री तथा राष्ट्रिय स्वतन्त्र पार्टीबाट निर्वाचित सांसद् डा. स्वर्णिम वाग्लेले अहिलेको लाइसेन्स प्रक्रियामा भ्रष्टाचार भएको बताएका छन् ।

आइतबार बैंक तथा वित्तीय संस्था परिसंघ (सीबीफिन)ले काठमाडौंमा आयोजना गरेको ‘नेपाल व्यवसाय शिखर सम्मेलन–२०२३’लाई सम्बोधन गर्दै वाग्लेले नयाँ स्टक एक्सचेन्ज, ब्रोकर तथा माइक्रो इन्स्योरेन्सलाई संकेत गर्दै भ्रष्टाचार भएको बताएका हुन् ।

“लाइसेन्स वितरणका कुराहरू अहिले आएका छन् । त्यसमा हाकाहाकी भनिदिए हुन्छ । सिधै करप्सन नै हो । इन्स्टिच्युसन करप्सन भइरहेको छ,” उनले भने, “प्रतिस्पर्धा चाहिन्छ, उपभोक्तालाई लाभ दिनुपर्छ । लागत घटाउनुपर्छ ।”

त्यस्तै, अहिले आर्थिक विकासका बाधक ऐन कानुन पनि भएको उनले बताए । करिब २८ देखि ४२ वटा ऐनमा नै समस्या भएको उनको भनाइ छ । वाग्लेले राजनीतिलाई सङ्ल्याउनुको विकल्प नभएको भन्दै सबै लागेर देशको विकास गर्नुपर्ने बताए ।

‍