काठमाडौं । मिडफिल्डर एलेक्सिस म्याकअलिस्टरले अन्तिम समयमा गरेको पेनाल्टी गोलमा ब्राइटनले बिहीबार राति इङ्लिस प्रिमियर लिगमा म्यानचेस्टर युनाइटेडमाथि १–० को विजय हासिल गरेको छ । 

पराजित भएपछि युनाइटेडको शीर्ष चारको सम्भावना धक्का लागेको छ । हारका बाबजुद इरिक टेन ह्यागको युनाइटेड ३३ खेलबाट ६३ अंक जोडेर चौथो स्थानमा यथावत छ । जुन पाँचौँ स्थानको लिभरपुलभन्दा चार अंकले मात्र माथि हो भने तेस्रो स्थानको न्युक्यासल युनाइटेडभन्दा दुई अंकले पछाडि हो । तथापि, लिभरपुलले एक खेल बढी खेलेको छ । 

हारसँगै युनाइटेडले तेस्रो स्थानमा उक्लने मौका गुमाएको हो । विजयी ब्राइटन भने ३२ खेलबाट ५५ अंक जोड्दै छैटौँ स्थानमा उक्लिएको छ । जुन लिभरपुलभन्दा चार अंकले पछाडि हो । ब्राइटनले लिभरपुलभन्दा दुई खेल कम खेलेको छ । 

जितसँगै ब्राइटनले युनाइटेडसँग ११ दिन अघि एफए कपको सेमिफाइनलमा हारेको बदला लिन सफल भएको छ । उक्त खेलमा युनाइटेडले ब्राइटनलाई पेनाल्टी सुटआउटमा ७–६ ले पराजित गर्दै फाइनलमा स्थान बनाएको थियो । 

घरेलु टोली ब्राइटनले सुरुबाटै युनाइटेडलाई दबाबमा राखेको थियो । चौथो मिनेटमै जापनिज विंगर काउरु मितोमाले भिक्टर लिन्डेलफबाट खोसेर हानेको प्रहार सिधै युनाइटेडका गोलकिपर डेबिड डी हियाको टाउकोमा लागेर फर्किएको थियो । त्यसअघि दोस्रो मिनेटमै युनाइटेडका एन्टोनियोले गोलको राम्रो अवसर खेर फालेका थिए । 

युनाइटेडका फरवार्ड एन्थोनी मार्सियालको प्रहारलाई ब्राइटनका गोलकिपर जसन स्टीलले बचाइदिएका थिए । युनाइटेडका कासेमिरोले १८ यार्ड बक्सबाहिरबाट हानेको प्रहार थोरैले बाहिरिएको थियो । पाँच मिनेट इन्जुरी समयको अन्तिम मिनेटमा लुकशको हातमा बल लागेपछि ब्राइटनले पेनाल्टी अवसर पाएको थियो । भिडियो सहायक रेफ्री (भीएआर)को मद्दतमा रेफ्री एन्ड्रे मारिनरले पेनाल्टीको निर्णय लिएका थिए । 

‘‘आज टिमले गरेको प्रदर्शन र नतिजाबाट साँच्चिकै खुसी छु,’’ ब्राइटनका प्रशिक्षक रोबर्टो डे जर्बीले भने, ‘‘फुटबलमा पनि भगवान छन् । हामी एफए कपको सेमिफाइनल जित्न योग्य थियौं । तर, पेनाल्टी सुटआउटमा पराजित भयौं । आज त्यही पेनाल्टीमा हामी जित्न सफल भयौं ।’’

युनाइटेडका रक्षक शले आफ्नो सानो गल्तिमा टिमले अंक गुमाउनु परेको स्वीकारेका छन् । 

‘‘एउटा मूर्खतापूर्ण गल्तिले एक अंक गुमायौं,’’ अर्को सिजन शीर्ष चारमा रहेर च्याम्पियन्स लिग खेल्ने सम्भावना बारे शले भने, ‘‘हामी नतिक रहेका टिमहरूले अंक बटुलिरहेका छन् । तर, हामीले अझै एक खेल कम खेलेका छौँ । र, त्यो खेल हाम्रो हातमा छ ।’’