काठमाडौं । ‘धोकेबाज हौ...’ कसको गीत हो ? शिव परियार कि एलिना चौहानको ? यसका गीतकार तथा संगीतकार सुवास कार्की (कार्कीजी) भन्छन्– यो दुवैको गीत हो ।
शिव र एलिना दुईजनाले गाएका छन् नि ? “हो, शिव परियार र एलिना चौहानले गाउनुभएको छ । शिव दाइले मेल भर्सनको र एलिनाले फिमेल भर्सन गाउनुभएको हो,” सुवास स्पष्ट पार्छन्, “एउटै गीत पछिल्लो समय मेल भर्सन र फिमेल भर्सनमा गाउन थालिएको छ । मेल र फिमेल भर्सन गाउँदा कसैले पनि यो मेरो मात्रै गीत हो भनेर दाबी गर्न पाउँदैन । दुवैको गीत हुन्छ ।”
पछिल्लो समय आधुनिक गायनमा चलेका गीतको ‘चाइल्ड भर्सन’ र ‘लिजेन्ड्री भर्सन’ पनि ल्याउने क्रम बढ्दो छ । यही गीतको पनि चाइल्ड भर्सन आइसकेको छ । ‘र्याप भर्सन’ पनि चाँडै ल्याइँदै छ । सुवास आफैँले र्याप भर्सन रेकर्ड गराइसकेका छन् । सुवास र्यापर हुन् । अबको केही दिनमै छायांकन गरेर र्याप भर्सन सार्वजनिक गरिने उनले जानकारी दिए ।
यसको कपिराइट युट्युब च्यानल नमस्ते प्लससँग रहेको सुवास बताउँछन् । यसका सञ्चालक रामकान्त न्यौपाने हुन्, उनी अष्ट्रेलियामा बस्दै आएका छन् ।
गायक शिव मेल र फिमेल भर्सन गाउँदैमा कभर नहुने बताउँछन् । मेल र फिमेल जसले अगाडि गाए पनि पछि गाउनेले कभर गाएको नहुने उनको तर्क छ ।
तर, मेलले गाएको गीत पुनः अर्को गायकले वा महिलाले गाएको फेरि अर्को गायिकाले गाएपछि गाउनेको भने कभर हुने शिवको तर्क छ । गीतकार तथा संगीतकार कार्की पनि हालसम्म यो गीतको कभर आधिकारिक रूपमा कसैलाई गाउन नलगाइएको बताउँछन् ।
“अब कोही मेल गायकले यो गीत गाउँछ भने त्यो कभर हुन्छ । फिमेलले गायो भने बल्ल कभर हुन्छ, को ओरिजिनल सिंगर भन्ने विवाद हुन्छ । यो गीतमा अहिलेसम्म हामी कसैबीच विवाद छैन । विवाद गर्नुपर्ने कारण पनि छैन,” शिव भन्छन् ।
अञ्जु पन्तले गाएको गजल ‘न बिर्सेँ तिमीलाई...’ पछि रचना रिमालले गाइन् । रचनाले गाएको कभर हो । कारण, फिमेल भर्सनमा त्यसअघि नै अञ्जुले गाइसकेकी थिइन् । यस्तो अवस्थामा को ओरिजिनल भन्ने प्रश्न उठ्नु स्वाभाविक हो ।
“‘फूलैफूल दिन्छौ कि...’ कसको गीत हो ? मैले पनि गाएको छु । अस्मिता अधिकारीले पनि गाउनुभएको छ,” शिव भन्छन्, “त्यसो भए यो गीत अस्मिताको होइन, मेरो मात्रै हो भनेर मैले भन्ने ? मेरो पनि हो, अस्मिताको पनि हो ।” अब कसैले गाए बल्ल ओरिजिनल गायक/गायिका को भन्ने दाबी गर्न सकिने उनको भनाइ छ ।
‘फूलबुट्टे सारी...’ सबैभन्दा पछि ‘लिजेन्ड्री भर्सन’मा मदनकृष्ण श्रेष्ठले गाएको बताउँदै शिव भन्छन्, “मदन दाइले कभर गर्नुभयो, उहाँको यो गीत होइन भन्ने ?”
‘धोकेबाज...’ लाई लिएर शिव र एलिना कसैले पनि यो गीतको ओरिजिनल सिंगर हुँ भनेर दाबी गरेका छैनन् ।
मेल र फिमेल भर्सनमा अगाडि गाउनेको ओरिजिनल र पछि गाउनेको कभर भन्ने नहुने सुवास बताउँछन् । “बुझ्दै नबुझी यत्तिकै लेखेको पाइयो । बिनाकारण र आधार विवाद सिर्जना गर्ने प्रयास गरिएको छ,” उनी अगाडि स्पष्ट पार्छन्, “विवाद गर्ने यो गीतमा अहिलेसम्म कुनै विषय र पक्ष देखिएको छैन ।” अहिलेसम्म गाउने शिव, एलिना र सुप्रिम मल्ल ठकुरी सबै यो गीतका ओरिजिनल गायक/गायिका भएको तथ्यमा नझुक्किन उनको आग्रह छ ।
‘धोकेबाज...’ सुरुमा एलिनाले गाएकी थिइन् । त्यसपछि मेल भर्सनमा यो गीत शिवको स्वरमा आएको थियो ।
पहिलो लकडाउनमा सुवासले कम्पोज गरेको यो गीत दोस्रो लकडाउनपछि सार्वजनिक गरिएको थियो । र्यापर सुवासको यो पहिलो आधुनिक गीत हो । यस्तै अरू गीत पनि सार्वजनिक गर्ने तयारी अवस्थामा रहेको उनी सुनाउँछन् ।
