काठमाडौं । आईसीसी विश्व क्रिकेट लिग च्याम्पियनसिप अन्तर्गत छैटौं चरणको हङकङसँगको खेलका लागि नेपाली क्रिकेट टिमले आज (बुधबार) देखि तयारी थालेको छ । करिब १ महिना अघिदेखि नै तयारीमा व्यस्त रहेको टिम दशैं बिदा सकिएलगत्तै अभ्यासमा जुटेको हो ।

कीर्तिपुरस्थित टियू क्रिकेट मैदानमा नेपाली क्रिकेट टिमले अभ्यास गरिरहेको छ । पारस खड्काको कप्तानीमा रहेको नेपाली क्रिकेट टिमले अक्टोबर १३ र १५ मा हङकङसँग प्रतिस्पर्धा गर्दैछ । तालिकामा नेपाल छैटौं स्थानमा छ भने हङकङ चौथो स्थानमा छ । नेपालको १० खेलबाट ४ खेलमा जित र ६ खेलमा पराजित हँुदै ८ अंक रहेको छ । हङकङको भने १० खेलबाट ११ अंक रहेको छ ।

तालिकाको शीर्ष स्थानमा भने नेदरल्याण्ड रहेको छ । दोस्रो स्थानमा पपुवा न्युगिनी रहेको छ भने तेस्रो स्थानमा स्कटल्याण्ड रहेको छ । तालिकाको शीर्ष ४ मा पर्ने टिमले २०१८ मा हुने विश्वकप छनोट खेल्न पाउनेछन् ।

हङकङसँगको खेललाई मध्यनजर गर्दै नेपाली क्रिकेट टिम भारतको चेन्नई भ्रमणमा गएको थियो । भ्रमणको दौरानमा नेपालले भारतको स्थानीय क्लबसँग ४ खेल खेलको थियो । ३ खेलमा जित हात पारेको नेपाल अन्तिम अभ्यास खेलमा भने पराजित भएको थियो ।

नेपाली क्रिकेट टिमका खेलाडीको यसअघि नै अन्तिम नामावली सार्वजनिक भइसकेको छ । कप्तान पारस खड्काको नेतृत्वमा उपकप्तान ज्ञानेन्द्र मल्ल, शरद भेषवाकर, बसन्त रेग्मी, सन्दिप लामिछाने, सोमपाल कामी, सागर पुन, करण केसी र विनोद भण्डारी टिममा छन् ।

त्यस्तै, दिपेन्द्रसिंह ऐरी, सुशान भारी, आरिफ शेख पनि टिममा परेका छन् भने पहिलो पटक दुई नयाँ अनुहार ललित भण्डारी र सुशिल कँडेल टिममा समावेश छन् ।