बुटवल । अन्धविश्वासमा पर्दा रुपन्देहीमा एक बालिकाले ज्यान गुमाएकी छन् । सैनामैना नगरपालिका–१०, झिमझिमेकी १४ वर्षीया सीता ज्ञवालीको यही फागुन २० गते राति मृत्यु भएको हो ।

कान दुखेर बिरामी परेकी ज्ञवालीको ‘झारफुक’का नाममा दिइएको चरम यातनापछि मृत्यु भएको थियो । ‘माता’ भनिने स्थानीय २२ वर्षीया सोनिया रेश्मीले झारफुक गरेर बिरामी निको बनाउने भन्दै शारीरिक यातना दिएकी थिइन् ।

त्यस कार्यमा संलग्न रहेको आरोपमा १७ जनालाई प्रहरीले पक्राउ गरेको छ । पक्राउ पर्नेमा यातना दिने सोनिया र मृतक सीताका बुवासहित घटना र दाहसंस्कारमा संलग्नहरूसमेत रहेको प्रहरीले जनाएको छ ।

प्रहरीले पक्राउ परेकाको नाम भने खुलाएको छैन । घटनाबारे अनुसन्धान भइरहेकाले पक्राउ परेकाको नाम सार्वजनिक नगरिएको जिल्ला प्रहरी कार्यालय रुपन्देहीका सूचना अधिकारी एवं प्रहरी निरीक्षक दीपक कुँवरले बताए ।

यस्तो थियो घटना
सोनियाले सीतालाई भुइँमा घोप्टो पारी लडाउने, शरीरमा बस्दै गालामा थप्पड हान्ने, टाउकोबाट पानी खन्याइदिने, मुखमा थुक्दै खरानी खुवाउनेसम्मको चरम यातना दिएकी थिइन् । सोनियाले यातना दिँदा पनि सीताका आफन्तले रोक लगाएनन् । उनीहरूले घटनाको भिडियो खिचिरहेका थिए ।

सोही यातनाका कारण सीताको मृत्यु भएको थियो । मृतकका परिवारले राति नै कपिलवस्तुको लक्ष्मणघाटमा लगेर उनको दाहसंस्कार गरी घटना गुपचुप राखिएको थियो ।

पछि यातनाको भिडियो सार्वजनिक भएको थियो । त्यसलगत्तै इलाका प्रहरी कार्यालय सालझण्डीले अनुसन्धान सुरु ग¥यो । सोही क्रममा प्रहरी टोलीले गएको सोमबार सोनियालाई पक्राउ गरेको थियो । घटना लुकाउन रातारात गरिएको दाहसंस्कारमा संलग्नहरू भने पक्राउ परेका थिएनन् ।

सीताको मृत्यु हुने गरी यातना दिइरहँदा हेरेर बस्ने उनका आफन्त, भिडियो खिच्ने व्यक्ति र दाहसंस्कारमा संलग्नहरूलाई समेत पक्राउ गर्न सामाजिक सञ्जालमार्फत प्रहरीमाथि दबाब दिइएको थियो ।