काठमाडौं । दशैंं नेपालीहरुको सबैभन्दा ठूलो चाड हो । दिन रात अभ्यास तथा प्रतियोगितामा व्यस्त भइरहने खेलाडीले सधै दशैं मनाउन पाउँदैनन् । राष्ट्रका गहना मानिने खेलाडीको दशैंं स्पेशल के हुन्छ ?

समर्थक तथा उनका फ्यानहरूलाई जान्न इच्छा हुन्छ । देशको प्रतिनिधित्व गर्दै अन्तर्राष्ट्रिय एरिनामा राष्ट्रिय झण्डा फरफराउने विभिन्न खेलका ५ कप्तानहरूको २०७४ सालको दशैं योजना के छ ? कसरी मनाउदै छन् त दशैंं ?

विराज महर्जन
कप्तान, नेपाली राष्ट्रिय फुटबल टिम
सबै परिवारसँग घरैमा बस्ने, आफ्नो मुख्य देवताको पुजाआजा गर्ने, विहानदेखि बेलुकासम्म रमाइलो गरेर बसिन्छ । मेरो लागि प्रत्येक बर्षको दशैं रमाइलो लाग्छ । ठूलो बुवा घर आउनु हुन्छ हामी सबै जना घरैमा बसेर रमाइलो गर्छौ ।
मेरो त्यस्तो स्पेसल प्लान त छैन । प्रत्येक बर्ष परिवारसँगै बसेर बनाउने गरेको छु । अघिल्लो बर्ष चाँहि त्यति दशैं पनि मनाउन पाइएन । यो बर्षचाँहि रमाइलो हुनेछ ।

सानो छदाको दशैंं त्यसै रमाइलो । सानोमा मिठो खाने कुरा खाँदा, नयाँ लुगा लगाउँदा म निकै खुशी हुन्थे । 
आफूभन्दा सानो भाईबहिनीहरूले रमाइलो गरेको देख्दा बालकपनको याद आउँछ ।
बाबाआमाले सानोमा दशैंंका लागि हामी तीन जना दाजुभाइलाई एउटै किसिमको लुगा, जुत्ता किनी दिनु हुन्थ्यो । खानेदेखि सबै कुराहरू हामी दाजुभाईलाई एउटै किसिमको किनी दिनुहुन्थ्यो । पछि अलिक ठूलो भएर चाँहि हामाी रिसाउँथ्यौ । छुट्टाछुट्टै किनिदिनु भनेर । आजभोलि जब दशंै आउछ, सम्झिन्छु, रमाइलो लाग्छ ।

इम राना
कप्तान, नेपाली राष्ट्रिय भलिबल टिम
अफिसले विदा कतिसम्म दिन्छ भन्ने कुरा मुख्य हो । घर (कास्की) गएर मनाउनु कि यहि योजना बनिसकेको छैन । गाउँमा गएर मनाउन पाए दशैंं अलिक रमाइलो हुनेछ । पूर्णिमासम्मको विदा भयो भने चाँहि केही प्लानिङहरू हुन सक्छ ।
दशैंमा आमाको हातबाट टिका लगाउने, आशिर्वाद थाप्ने त्यहि हो । दशैं स्पेशल खासै केही छैन । गाँउ गइनँ भने यहि साथीभाईसँग मिलेर खशी किनेर काट्ने, खाने रमाइलो गर्ने प्लानिङ छ । 

यो भन्दाअघिको दशैं मैले काठमाडौं मै मनाए । घरमा जुठो परेको थियो त्यसैले यही साथीभाईसँग दशैं मनाएको थिए । 
सानो छदा दशैं आयो भनेपछि माहोल नै अर्कै हुन्थ्यो । रमाइलो फिल हुन्थ्यो । ठूलो बढाकोमा टिका लगाउन जाने, आशिर्वाद थाप्ने, बेसीभन्दा बेसी टिका लगाउन जाने पैसा थाप्ने भन्ने हुन्थ्यो सानोमा । अब अहिले ठूलोबडा तथा जेष्टको हातबाट टिका लगाउने भन्ने हुन्छ ।

सानोमा ठूलोबडाले ठूलो भएस्, राम्रो गरेर खाएस् भन्नु  हुन्थ्यो । उहाँहरूकै आशिर्वादले अहिले यो स्थानमा छु । पैसा भने जति नदिएको भन्दै सानोमा झगडा चाँहि गरिन ।

रुविना क्षेत्री
कप्तान, महिला राष्ट्रिय क्रिकेट टिम
मलाई सबैभन्दा मन पर्ने चार्ड नै दशैं तिहार हो । तर, यसपटक भने मैले दशैं मनाउन नपाउने भए । 
म अहिले बंगलादेशको महिला प्रिमियर डिभिजन क्रिकेट लिग खेल्दैछु । जारी प्रतियोगितामा म रुपाली बेंक क्रिरा परिशदबाट खेली रहेको छु । मेरो लागि यो राम्रो प्लेटफर्म पनि हो । यही प्रतियोगिताको कारण यसपालीको दशैं छुट्ने भयो ।

निकै मिस गर्नेछु दशैंलाई । सानो हुँदा नयाँ नयाँ लुगा लगाउन पाउँदा निकै खुशी हुन्थ्यौ । बालखपनको दशैं पैसा संकलन गर्ने भन्ने पनि हुन्थ्यो । सानोमा दादालाई जति पैसा दियो मलाई पनि त्यति नै दिनु भनेर जिद्दी गर्थे । दादाको पैसा पनि लाने मेरो बानी थियो । अहिले सम्झिदा त्यो बालखपनको यादले निकै हाँस उठ्छ । खुशी लाग्छ ।

सधिश प्रधान
कप्तान, नेपाली राष्ट्रिय बास्केटबल
यो वर्ष चाँहि दशैं मनाइन्छ । विगत दुई बर्ष मैले दशैं पाहिएन । घरमा जुठो लागेको थियो ।
त्यस्तो दशैंं स्पेशल प्लानिङ त छैन । घरैमा आफन्तजनबाट टिका लगाउने साथिभाईसँग रमाइलो गर्ने त्यहि हो । 
बच्चामा हजुरबुवा हजुर आमा इलाममा हुनुहुन्थ्यो । दशैं आउदा हामी टिका लगाउन इलाम जान्थ्यो । घुम्थ्यौ । निकै रमाइलो हुन्थ्यो । पछि उहाँहरू पनि यतै आउनु भयो त्यसैले गाँउ गएको छुइन खासै ।

यतै मनाउदै आएको छौ दशैं । बच्चा बेलामा नै रमाइलो लाग्थ्यो । साथिभाईरूसँग रमाइलो गरिन्थ्यो । दशैं भन्ने वितिकै बुवा ममीले नयाँ लुगा निकिदिनु हुने लगायतका कुराहरू हुन्थ्यो । अहिले छुट्टै किसिमको रमाइलो छ । अहिले दशैं भन्ने वितिकै अर्कै जिम्मेवारी पनि छ । दशैंं तिहारको विचमा विदा मिल्यो भने श्रीमतीसँग बाहिर घुम्न जाने योजना छ । 

हाम्रो दशैं तिहार लामो विदा छ । तर, हाम्रो ट्रेनिङ चाँहि भई रहन्छ । आर्मी क्लबमा आबद्ध भएको ४ वर्षमा लाग्दैछ । अहिले तत्काल प्रतियोगिता त छैन । अब २०१८ तिर १–२ प्रतियोगिता हुन्छ होला । त्यसपछि त हामी २०१९ मा हुने दक्षिण एसियाली खेलकुद प्रतियोगिताको लागि क्लोज क्याम्पमा हुनेछौ ।

विनिता बुढाथोकी
कप्तान, नेपाली महिला भलिबल टिम
दशैंं निजिदै गर्दा पनि टिकट नपाउदा सुरुमा घर जादिन कि जस्तो लागेको थियो तर अन्ततः टिकट पाएँ । यो पटक पनि पहिले भन्दा पृथक तरिकाको दशैंं हुनेवाला छैन । त्यस्तो स्पेशल केही छैन ।

अब आउने बर्ष के हो के भनेर यो पटक ठूलो बढाको हातबाट आशिर्वाद लिने छु । बुवा आमाको हातबाट टिका लगाउने हो रमाइलो गर्ने हो, त्यही हो मेरो प्लान । मामा घर पनि गइन्छ दशैंमा सबैसँग भेट हुन्छ ।

यो पटक पहिलेको जतिको रमाइलो अलिक हुदैन कि जस्तो लागेको छ । किनभने यसअघिको दशैंमा हामी सबै जना उपस्थित भएका थियौं । हामी ५ जना दिदिबहिनी नै थियौं यो पटक भने टिकाको दिन म मात्रै हुन्छ र त्यसको भोलिपल्ट एक जना दिदि आउनु हुन्छ ।

विदा त्यति लामो छैन । १८ गते म काठमाडौं फर्कीसक्नु पर्ने हुन्छ । किनभने भारतको दिल्लीमा मदन भण्डारी स्पोर्ट्स क्लबले कात्र्तिक ११ गतेदेखि प्रतियोगिता आयोजना गर्दै छ । त्यसको तयारी पनि गर्नु छ । प्रतियोगितामा नेपालबाट महिलामा एपीएफ र न्यु डायमण्ड तथा पुरुषमा पुलिस र एपीएफ क्लबको सहभागिता रहने छन् ।