काठमाडौंं । कुशल भुर्तेलले कीर्तिमानी इनिङ्स खेलेपछि नेपाली राष्ट्रिय क्रिकेट टिमले मंगलबार आईसीसी क्रिकेट विश्वकप लिग–२ मा नामिबियाविरुद्ध कीर्तिमानी विजय हासिल गरेको छ ।

कीर्तिपुरस्थित त्रिवि क्रिकेट मैदानमा नामिबियाले प्रस्तुत गरेको २८६ रनको लक्ष्य नेपालले ४७.४ ओभरमा आठ विकेट गुमाएर पूरा गर्‍यो । एकदिवसीय अन्तर्राष्ट्रिय क्रिकेटमा नेपालले सफलतापूर्वक पूरा गरेको यो अहिलेसम्मकै उच्च स्कोर हो । नेपालले यसअघि सन् २०१९ मा कीर्तिपुरमै युनाइटेड अरब इमिरेट्स (यूएई)ले प्रस्तुत गरेको २५५ रनको लक्ष्य पूरा गरेको थियो ।

नेपाललाई कीर्तिमानी जित दिलाउन ओपनर कुशल भुर्तेलले ११५ रन बनाए । कुशलले ११३ बलमा १० चौका र चार छक्का प्रहार गरे । यस्तै, कप्तान रोहितकुमार पौडेलले ७६ बलमा सात चौका र तीन छक्कासहित ७२ रन बनाए ।

नेपालका लागि सन्दीप जोराले २९, ज्ञानेन्द्र मल्लले २५, दीपेन्द्रसिंह ऐरीले सात र कुशल मल्लले ६ रन बनाउँदा अर्का ओपनर आसिफ शेख भने डक आउट भए । करण केसी २० र सोमपाल कामी चार रनमा अविजित रहे ।

सन्दीप लामिछाने गोल्डेन डक भए । 

नामिबियाका रुबेन ट्रम्पेलम्यान र यान निकोल लोफ्टी इटोनले समान तीन विकेट लिए । बर्नार्ड स्कल्ज र टाङ्गेनी लुङ्गामेनीले समान एक विकेट लिए ।

त्यसअघि टस हारेर पहिले ब्याटिङ गरेको नामिबियाले निर्धारित ५० ओभरमा सबै विकेट गुमाएर २८५ रन बनायो । नामिबियाका माइकल भान लिगेनले १३७ बलमा नौ चौका र पाँच छक्कासहित १३३ रन बनाएका थिए । अन्तर्राष्ट्रिय क्रिकेटमा तेस्रो शतक प्रहार गरेका लिगेनको यो नै अहिलेसम्मको व्यक्तिगत उच्च स्कोर पनि हो ।

कप्तान जेरार्ड इरास्मसले ५६ रन बनाए । लिगेनले तेस्रो विकेटका लागि कप्तान जेरार्ड इरास्मससँग १२४ रनको साझेदारी गरेका थिए । यसबाहेक जन ग्रिनले ३४, कार्ल बिर्केनस्टोक र जान फ्राइलिङ्कले समान १३ रन जोड्दा रुबेन ट्रम्पेलम्यानले ११ रन थपे ।

नेपालका करण केसीले पाँच विकेट लिएका थिए । १० ओभर बलिङ गरेका उनले एक मेडनसहित ६१ रन खर्चिए । ६ महिनापछि राष्ट्रिय टिममा ‘कमब्याक’ गरेका सन्दीप लामिछानेले तीन विकेट लिए । कुशल मल्ल र सोमपाल कामीले समान एक विकेट लिए । 

जितसँगै २५ खेलबाट २० अंक जोडेको नेपाल तालिकाको छैटौँ स्थानमा छ । यस्तै, ३१ खेलबाट ३७ अंक जोडेको नामिबिया तेस्रो स्थानमा छ । तालिकाको शीर्ष स्थानमा रहेको स्कटल्यान्डले ३२ खेलबाट ४६ अंक जोडेको छ ।

रोहितको पार गरे एक हजार रनको कोशेढुंगा

कप्तान रोहितकुमारले एकदिवसीय अन्तर्राष्ट्रिय क्रिकेटमा एक हजार रन बनाएका छन् । एकदिवसीय अन्तर्राष्ट्रिय क्रिकेटमा एक हजार रन पूरा गर्ने रोहित पहिलो नेपाली खेलाडी बनेका छन् । 

मंगलबार नामिबियाविरुद्ध खेल्नुअघि रोहितले ९४५ रन बनाइसकेका थिए । रोहितले नामिबियाविरुद्ध २६औँ ओभरको पहिलो बलमा चौका प्रहार गर्दै एक हजार रन पूरा गरेका हुन् । रोहितले ३३ इनिङ्समा यो कोशेढुंगा पार गर्न सफल भएका हुन् । २०१८ मा नेदरल्यान्ड्सविरुद्धको खेलबाट एकदिवसीय अन्तर्राष्ट्रिय क्रिकेटमा डेब्यू गरेका रोहितले ६ अर्धशतक र एक शतक बनाइसकेका छन् ।

रोहित एकदिवसीय अन्तर्राष्ट्रिय क्रिकेटमा सबैभन्दा धेरै रन बनाउने खेलाडी पनि हुन् । रोहित मंगलबार ७२ रन बनाएर आउट भए । उनले ७६ बलमा सात चौका र तीन छक्का प्रहार गरेका थिए । रोहितले एक हजार १७ रन बनाइसकेका छन् । यसक्रममा उनले ७० चौका र १८ छक्का प्रहार गरेका छन् । 

रोहितपछि धेरै रन बनाउँनेमा ज्ञानेन्द्र मल्ल छन् । पूर्व कप्तान ज्ञानेन्द्रले ७३४ रन बनाएका छन् । तेस्रो स्थानमा आसिफ शेख छन् । आसिफले ६५५ रन बनाएका छन् । 

कीर्तिमानी साझेदारी

रोहितकुमार पौडेलले मंगलबार ओपनर कुशल भुर्तेलसँग मिलेर अर्को पनि कीर्तिमान बनाए । रोहित र कुशलले नेपालबाट सबैभन्दा धेरै रनको साझेदारी गरे । कुशल र रोहितले नामिबियाविरुद्ध तेस्रो विकेटका लागि १३३ रनको साझेदारी गरे । 

रोहितले ७६ बलमा ७२ रन बनाएका थिए भने कुशलले ११५ रन बनाए । 

यसअघि यो कीर्तिमान दीपेन्द्रसिंह ऐरी र देव खनालको नाममा थियो । दीपेन्द्रसिंह र देवले कीर्तिपुरको त्रिवि मैदानमै पीएनजीविरुद्ध तेस्रो विकेटकै लागि १२९ रनको साझेदारी गरेका थिए । 

कुशलको कीर्तिमानी शतक

ओपनर कुशल भुर्तेलले एकदिवसीय अन्तर्राष्ट्रिय क्रिकेटमा पहिलो शतक बनाएका छन् । उनले ४१औँ आन्तिम बलमा शतक पूरा गरेका हुन् । शतक बनाउने क्रममा कुशलले ९९ बलमा ९ चौका र चार छक्का प्रहार गरे । कुशल एकदिवसीय अन्तर्राष्ट्रिय क्रिकेटमा शतक बनाउने नेपालका पहिलो ओपनर पनि बनेका छन् ।

यससँगै एकदिवसीय अन्तर्राष्ट्रिय र ट्वान्टी–२० अन्तर्राष्ट्रिय दुवै स्वरूपमा शतक बनाउने नेपालको तेस्रो खेलाडी बनेका छन् । कुशलले गत वर्ष ओमानमा सम्पन्न ट्वान्टी–२० विश्वकप छनोटमा फिलिपिन्सविरुद्ध अविजित १०४ रन बनाएका थिए । ट्वान्टी–२० अन्तर्राष्ट्रिय क्रिकेटमा उनको त्यो पहिलो शतक हो । 

यसअघि पूर्व कप्तान पारस खड्का र दीपेन्द्रसिंहले मात्र एकदिवसीय अन्तर्राष्ट्रिय र ट्वान्टी–२० अन्तर्राष्ट्रिय गरी दुवै संरचनामा शतक बनाएका थिए । 

करणको पाँच विकेट

करण केसीले १० ओभरमा एक मेडन राख्दै ६१ रन दिएर पाँच विकेट लिए । एकदिवसीय अन्तर्राष्ट्रिय क्रिकेटमा करणले एकै इनिङ्समा पाँच विकेट लिएको यो तेस्रोपटक हो । यससँगै एकदिवसीय अन्तर्राष्ट्रिय क्रिकेटमा तीनपटक पाँच विकेट लिने करण पहिलो नेपाली खेलाडी बनेका छन् । 

करणले अन्तिम बलमा बेनार्ड शोल्टजलाई रोहित पौडेलबाट क्याच गराउँदै पाँच विकेट लिएका हुन् । यसअघि गत जुनमा ओमानविरुद्धको दुवै खेलमा समान पाँच विकेट लिएका थिए ।

एकदिवसीय क्रिकेटमा करणपछि सन्दीप लामिछानेले एकै इनिङ्समा दुईपटक पाँच विकेट लिएका छन् । सन्दीपले २०२० फेब्रुअरीमा कीर्तिपुर मैदानमै अमेरिकाविरुद्ध ६ विकेट लिएका थिए । सन्दीपले २०२१ सेप्टेम्बरमा पपुवा न्युगिनी (पीएनजी)विरुद्ध पनि ६ विकेट लिएका थिए । 

अर्का बलर सोमपाल कामी पनि एक पटक पाँच विकेट लिएका छन् । नेपालबाट ओडिआईमा पाँच विकेट लिने पहिलो खेलाडी हुन् । सोमपालले २०१९ मा यूएईविरुद्ध ५ विकेट लिएका थिए ।

नामिबियाका मिचेल भान लिगेनको शतक गयो खेर

नामिबियाबाट तेस्रो नम्बरमा ब्याटिङका लागि आएका मिचेल भान लिगेनले १३३ रन बनाए । उनले १३७ बलमा ९ चौका र पाँच छक्कासहित १३३ रन बनाएका हुन् । लिगेनले ११८ बलमा ६ चौका र चार छक्कासहित १०० रन पूरा गरेका थिए । एकदिवसीय अन्तर्राष्ट्रिय क्रिकेटमा लिगेनको तेस्रो शतक हो । 

यसअघि लिगेनले तेस्रो विकेट कप्तान जेरार्ड इरास्मससँग १२४ रनको साझेदारी गरेका थिए । लिगेनलाई करणले दीपेन्द्रसिंहको हातबाट क्याच गरेका थिए । नामिबियाले ५० ओभरमा सबै विकेट गुमाएर २८५ रन बनाएको थियो । 

तस्बिरहरू : सुनिल प्रधान/बाह्रखरी